კვირიდან [13 დეკემბერი] ლომბარდია ოფიციალურად გახდება „ყვითელი ზონა“, – ამის შესახებ ინფორმაციას რეგიონის პრეზიდენტი ატილიო ფონტანა თავის ტვიტერის გვერდზე ავრცელებს.
„მინისტრმა სპერანცამ მომაწოდა ინფორმაცია, რომ როგორც წინაზე, ახლაც პარასკევს ხელს მოაწერს დადგენილებას, რომელიც შაბათს გამოქვეყნდება, ხოლო კვირას ძალაში შევა“, – დაწერა ფონტანამ.
მისი თქმით, შემცირების ტენდენცია ლომბარდიაში აშკარაა როგორც ვირუსის ცირკულაციის, ისე ჰოსპიტალიზაციის მხრივ ჩვეულებრივ და ინტენსიური თერაპიის პალატებში.
„შედეგი მიღწეულია ყველა ლომბარდიელის სამაგალითო ქცევით, როელთაც კიდევ ერთხელ ვუხდი მადლობას. ყველას მოვუწოდებ, ყოველდღიური პასუხისმგებლობის ეს გზა გავაგრძელოთ, რომელიც საშუალებას მოგვცემს, ვირუსი ვაკონტროლოთ. Forza Lombardia!“ – წერს ატილიო ფონტანა სოციალურ ქსელში.
🟡 Da domenica la Lombardia sarà ufficialmente zona gialla. Questa mattina ho parlato con il ministro Speranza il quale mi ha informato che, come per le volte precedenti, venerdì firmerà l’ordinanza, sabato sarà pubblicata e domenica entrerà in vigore.
Grazie a tutti i lombardi.— Attilio Fontana (@FontanaPres) December 9, 2020
ეპიდემიოლოგიური თვალსაზრისით „ყვითელ ზონაში“ გადასვლა რეგიონს საშუალებას მისცემს, შეამსუბუქოს ზოგიერთი შეზღუდვა (მათ შორის, რესტორნების, ბარების და საზკვების სხვა ობიექტების მუშაობასთან დაკავშირებით).
დღეს საღამოს იტალიის ჯანდაცვის სამინისტროს მიერ გამოცხადებული ახალი მონაცემებით, ქვეყანაში ბოლო 24 საათში კორონავირუსის 12756 ახალი შემთხვევა დარეგისტრირდა (ჩატარდა 118 475 ტესტი, რაც 30 ათასით ნაკლებია წინა დღესთან შედარებით; აღსანიშნავია, რომ პოზიტიურობის დონე 10,8%-ია).
გასულ ერთ დღე-ღამეში ქვეყანაში კიდევ 499 კოვიდ-პაციენტი გარდაიცვალა.
შემცირდა პოსპიტალიზაციის მაჩვენებელი, მათ შორის, 25-ით შემცირდა ინტენსიური თერაპიის პაციენტთა რიცხვი (3320).
გამოჯანმრთელებულ პაციენტთა მთლიანი რაოდენობა კი მილიონს მიუახლოვდა – გასულ 24 საათში მათი რიცხვი 39 266-ით გაიზარდა და 997 895 შეადგინა.
ნინო ხოშტარია
კომენტარები