ჯო ბაიდენი და საქართველო

აშშ-ის პრეზიდენტის პოსტს ჯო ბაიდენი დაიკავებს –  ასეთია წამყვანი მედიასაშუალებების დასკვნა კენჭისყრის შედეგების მიხედვით. მართალია, მისი მოწინააღმდეგე არჩევნებში, მოქმედი პრეზიდენტი დონალდ ტრამპი თავის დამარცხებას ჯერ არ აღიარებს და სასამართლოს მიმართავს, თუმცა ბაიდენი უკვე იღებს მილოცვებს. ჯოზეფ ბაიდენი ისტორიაში შევა, როგორც ქვეყნის ყველაზე ხანდაზმული მეთაური – იგი 78 წლის იქნება (20 ნოემბერს ხდება), როდესაც პრეზიდენტის პოსტს დაიკავებს. ბაიდენის, როგორც აშშ-ის 46-ე პრეზიდენტის, ინაუგურაცია 2021 წლის 20 იანვარს გაიმართება. აქამდე ყველაზე ხანდაზმული დონალდ ტრამპი იყო – იგი აშშ-ის პრეზიდენტი 70 წლის ასაკში გახდა.

გთავაზობთ ამონარიდს „რადიო თავისუფლების“ სტატიიდან „ჯოზეფ ბაიდენის გზა თეთრ სახლამდე“:

ჯო ბაიდენი და საქართველო

ჯოზეფ ბაიდენი საქართველოში ორჯერ არის ნამყოფი – პირველად 2008 წლის ომის დროს, როდესაც ჯერ კიდევ სენატორი იყო. ბაიდენი გახდა საქართველოსთვის ერთმილიარდიანი დახმარების გამოყოფის ინიციატორი.

მეორედ იგი საქართველოში 2009 წლის ივლისში ჩამოვიდა, აშშ-ის ვიცე-პრეზიდენტის რანგში.

„მაშინ მირჩიეს, არ წამოვსულიყავი, მაგრამ მე ვიცოდი, რატომ არის ჩემი ქვეყნისთვის ასე მნიშვნელოვანი თქვენი ქვეყნის თავისუფლება და სუვერენიტეტი. მე ჩამოვედი აქ და ვთქვი, რომ ვარ და ვიქნები თქვენ გვერდით და ამ ჩემს აღთქმას ამჯერად ვასრულებ, როგორც ამერიკის შეერთებული შტატების ვიცე-პრეზიდენტი“,  – თქვა ჯოზეფ ბაიდენმა 2009 წლის ვიზიტის დროს საქართველოს პარლამენტში გამოსვლისას. ბაიდენი მაშინ თბილისში პრეზიდენტ ბარაკ ობამას მოსკოვში ვიზიტის კვალდაკვალ ჩამოვიდა:

„მე ვლაპარაკობ არა მარტო ჩემი სახელით, ასევე, პრეზიდენტ ბარაკ ობამას სახელითაც. თბილისში ეს სტუმრობა მართლაცდა გამიზნულად მოჰყვა პრეზიდენტ ობამას მოსკოვში ვიზიტს. სწორედ ამიტომ გეგმავდა და სწორედ ამიტომ მომცა მეც დარიგება, თბილისში ვიზიტი დამეგეგმა. მე ვიცი, ბევრი წუხს და სვამს შეკითხვას, რუსეთთან ურთიერთობის გაუმჯობესება საქართველოს ხარჯზე ხომ არ უნდა მოხდეს. ნება მიბოძეთ მკაფიოდ ვთქვა, რომ არა, საქართველოს ხარჯზე არ მოხდება რუსეთთან ურთიერთობის გაუმჯობესება და რომ ეს შეუძლებელია. როგორც პრეზიდენტმა ობამამ ორი კვირის წინ დაადასტურა მოსკოვში, ჩვენ პრინციპების დამცველი ხალხი ვართ. ხალხებმა თვითონ უნდა აირჩიონ პარტნიორები, თვითონ უნდა გადაწყვიტონ თავიანთი ბედი. ჩვენ წინააღმდეგნი ვართ მეცხრამეტე საუკუნის ცნებებისა, გავლენის სფეროების ადგილი არ არის 21-ე საუკუნეში. ჩვენ არ მივიჩნევთ სამხრეთ ოსეთსა და აფხაზეთს დამოუკიდებელ სახელმწიფოებად, ჩვენ არ ვაღიარებთ მათ, როგორც დამოუკიდებელ სახელმწიფოებს, და მოვუწოდებთ რუსეთს პატივი სცეს საერთაშორისო ვალდებულებებს, მკაფიოდ ჩამოყალიბებულს, მათ შორის, თქვენი ტერიტორიიდან ყველა შეიარაღებული ძალის გაყვანისა და ცეცხლის შეწყვეტის ვალდებულებას“, – თქვა ბაიდენმა 2009 წელს.

ამის შემდეგაც, ვიცე-პრეზიდენტის რანგში, იგი არაერთხელ შეხვდა საქართველოს არაერთ წარმომადგენელს.

სტატია სრულად იხილეთ radiotavisufleba.ge-ზე.