საქართველოს მოქალაქეებისთვის საზღვარგარეთ საარჩევნო უბნების ელექტრონული რეესტრი შეიქმნა

საქართველოს საგარეო საქმეთა სამინისტროს საკონსულო დეპარტამენტმა საზღვარგარეთ საარჩევნო უბნების ელექტრონული რეესტრი შექმნა.

ინფორმაციას ამის შესახებ საქართველოს საგარეო საქმეთა სამინისტრო ავრცელებს.

უწყების ცნობით, ელექტრონული რეესტრის მეშვეობით საზღვარგარეთ მყოფ საქართველოს მოქალაქეებს საშუალება აქვთ, მოიძიონ საზღვარგარეთ გახსნილი საარჩევნო უბანი, სადაც 2020 წლის 31 ოქტომბრის საპარლამენტო არჩევნებში ხმის მიცემას შეძლებენ.

საზღვარგარეთ საარჩევნო უბნების ელექტრონული რეესტრი განთავსებულია საგარეო საქმეთა სამინისტროს საკონსულო დეპარტამენტის ელექტრონულ მისამართზე – https://geoconsul.gov.ge/ka/check/electionsPlace

ასევე, საზღვარგარეთ მყოფ საქართველოს მოქალაქეებს შეუძლიათ, გაეცნონ ინფორმაციას 2020 წლის 31 ოქტომბერს დანიშნულ საპარლამენტო არჩევნებსა და მასში შეუფერხებლად მონაწილეობის პროცედურასთან დაკავშირებით საქართველოს საგარეო საქმეთა სამინისტროს ვებგვერდზე – „არჩევნები 2020“ – https://mfa.gov.ge/elections.aspx

საქართველოში საპარლამენტო არჩევნები 31 ოქტომბერს არის დანიშნული.