რას წერდა თამარ ბაჩალიაშვილი ნორვეგიაში მცხოვრებ ქართველს

„თამარი იყო დაინტერესებული ქვეყნის ლოკაციის შეცვლით და მიზეზს ასახელებდა პოლიტიკურ თავშესაფარს“, – ამის შესახებ ნიკა გვარამიას „მთავარ აქცენტებში“ ნორვეგიაში მცხოვრებმა ქართველმა თეონა ყურუამ განაცხადა.

ყურუა იხსენებს, რომ მას შეეხმიანა თამარ ბაჩალიაშვილი და სთხოვდა ინფორმაციის მოძიებას პოლიტიკურ თავშესაფართან დაკავშირებით, ვინაიდან როგორც ბაჩალიაშვილი ამბობდა, მას ამისთვის კარგი მიზეზი ჰქონდა, ასევე, ჰქონდა ამის დამადასტურებელი საბუთებიც.

„მე 20 წელია ნორვეგიაში ვცხოვრობ, არ მინდა იფიქროთ, რომ რამე ინტერესი მქონდეს ამ საქმესთან მიმართებაში. დავიწყებ იმით, რომ თამუნა ჩემთან გამოვიდა კონტაქტზე იანვარში, დაახლოებით ვიცი, როდის იყო, რადგან მაგ დროისთვის ჩემი დაქალები მყავდა სტუმრად საქართველოდან. რაღაც ჯგუფში გამოვეხმაურე მის კომენტარს, მერე თამარმა მე პირადად მომწერა, მაგრამ მისი მონაწერი ვნახე რამდენიმე დღის შემდეგ. შევედი და შემთხვევით ამომიგდო თამარის მონაწერი და მითხრა, რომ თუ არ შეგაწუხებთ, მაქვს რამდენიმე კითხვაო. მეთქი არანაირი პრობლემა, მკითხეთ და გაგცემთ პასუხს-მეთქი.

პირველი მან მითხრა, რომ სურდა მაგისტრატურაზე სწავლის გაგრძელება და როგორ ხდებოდა, მე გავეცი პასუხი, რომ არ ვფლობდი ინფორმაციას სტუდენტურ ვიზებთან დაკავშირებით. ეს პირველი დიალოგი დიდხანს არ გასტანა. ბოდიში მომიხადა შეწუხებისთვის და დავემშვიდობე. რამდენიმე დღის შემდეგ ისევ შემომეხმიანა და მკითხა, თუ გავარკვიე რამე ამ თემაზე, მე მას მოვუბოდიშე, რადგან მქონდა გადატვირთული რეჟიმი და ვერ მოვახერხე ინფორმაციის მოძიება. შეგნებული გოგო ჩანდა და პირიქით მადლობა და ბოდიში მითხრა. მე ვუთხარი, რომ ამ საკითხზე, მოვუძიებდი ინფორმაციას.

ამ საუბრის შემდეგ მან პირველად ახსენა პოლიტიკური თავშესაფარი, თუ იცი რამე იმაზე, როგორ ხდება პოლიტიკური თავშესაფრის მოთხოვნა ნორვეგიაშიო. თამარი იყო დაინტერესებული ქვეყნის ლოკაციის შეცვლით და მიზეზს ასახელებდა პოლიტიკურ თავშესაფარს, თუმცა რას გულისხმობდა, არ ვიცი, რადგან მას შინაარსზე არ უსაუბრია. მან თქვა, რომ კარგი მიზეზი ჰქონდა ამისთვის. მე მას ავუხსენი, რომ ძალიან გამკაცრებულია სიტუაცია. როცა დამიდასტურა, მაქვს მიზეზიო, აღარაფერი ვუთხარი. მომწერა, რომ მაქვს საკმაოდ კარგი მიზეზიო და დამადასტურებელი საბუთებიო, რომ პოლიტიკური თავშესაფარი მოვითხოვოო. ისიც მოაყოლა, რომ უნდოდა წასულიყო ისეთ ქვეყანაში, საიდანაც უკან არ გაუშვებდნენ. ეს იმ მომენტში ჩვეულებრივი დიალოგი იყო ჩვენს შორის, მე მას ვკითხე, იგი თუ იყო დაოჯახებული, რადგან ამას მნიშვნელობა აქვს, როცა ითხოვ პოლიტიკურ თავშესაფარს. მითხრა, რომ არ ჰყავდა არც მეუღლე და არც შეყვარებული“, – განაცხადა თეონა ყურუამ.