პოლიტიკასაქართველო
საქართველოს ელჩი დავით დონდუა ბერძნებს დამოუკიდებლობის 200 წლისთავს ულოცავს
საქართველოს ელჩი საბერძნეთის რესპუბლიკაში დავით დონდუა ბერძნებს დამოუკიდებლობის დღეს ულოცავს. მილოცვა საქართველოს საელჩოს ოფიციალურ ფეისბუქგვერდზე გამოქვეყნდა.
„წელს სრულიად საბერძნეთი დამოუკიდებლობის 200 წლისთავს ზეიმობს. ეს დღე ყველგან აღინიშნება, სადაც კი ბერძნული დიასპორა არსებობს. დიდი მადლობა ლიტერატურულ საქართველოს, რომ მომცა შესაძლებლობა, ჩვენს ბერძენ თანამემამულეებს ეს ღირსახსოვარი დღე მივულოცო.
Χρονια πολλα αγαπητοί Έλληνες συμπατριώτες μας!
1821 წლის 25 მარტს, ხარება დღეს, ოსმალეთის იმპერიის მიერ დაპყრობილ საბერძნეთში პატრასის ეპისკოპოსმა, გერმანოსმა, მონასტრის თავზე რევოლუციის დროშა აღმართა. ამ დღიდან მოყოლებული, ბერძნებმა ცხრა წელი იომეს, სანამ საბოლოოდ გაიმარჯვებდნენ და ხელახლა შექმნიდნენ დამოუკიდებელ სახელმწიფოს. ხოლო მთავარ ეროვნულ დღესასწაულად მათ გამოაცხადეს არა საბოლოოდ გამარჯვების დღე, არამედ დღე, რომელმაც განმანთავისუფლებელ მოძრაობას მისცა დასაბამი. ალბათ იმიტომ, რომ ბერძნებს დამოუკიდებლობა ერთი ბრძოლით არ მოუპოვებიათ; ხოლო ეს რთული და ხანგრძლივი გზა, ერის სულიერი გამოღვიძებით დაიწყო. და სწორედ ამ დღეს ზეიმობენ ჩვენი ბერძენი ძმები.
ქართულ-ბერძნული კავშირები ოთხ ათასწლეულს ითვლის. ანტიკური ბერძნული კოლონიებიდან მოყოლებული დღემდე, საქართველოში მუდამ ცხოვრობდნენ ბერძნები. საუკუნეების განმავლობაში უამრავმა პონტოელმა ბერძენმა იპოვა სამკვიდრო ჩვენს ქვეყანაში. ბოლო ათასწლეულის განმავლობაში წარმოუდგენელია საქართველოს სოციალური, პოლიტიკური, ეკონომიკური, თუ კულტურული ცხოვრება ეთნიკური ბერძნების გარეშე. ყველაფერში თვალსაჩინოა ბერძნული გავლენა, იქნება ეს ყოფა-ცხოვრება, განათლება, არქიტექტურა თუ ხელოვნების სხვა დარგი.
მეოცე საუკუნეში საქართველოს ბინადარი ბევრი ბერძენი დაბრუნდა ისტორიულ სამშობლოში. სხვათა შორის, პირველ რეპატრიაციას 1920-იან წლებში, სათავეში ედგა ნიკოს კაზანძაკისი, რომელიც იმდენად მოიხიბლა ჩვენი ქვეყნით, რომ მისი ყველა კუთხე-კუნჭული მოინახულა და ბევრი მეგობარიც გაიჩინა.
ბოლო 30 წელიწადში საქართველოში ბერძნული დიასპორა განსაკუთრებით შემცირდა, სამაგიეროდ ბევრი ქართველი დამკვიდრდა საბერძნეთში. მე, როგორც საქართველოს ელჩმა, მინდა მადლიერებით აღვნიშნო, რომ ბერძენი ხალხი განსაკუთრებულ გულისხმიერებას იჩენს ქართველებისადმი. ტრადიციული ბერძნული ფილოქსენიის გარდა, სხვა ვერაფრით ავხსნი იმ ფაქტს, რომ დღეს ქართული დიასპორა ყველაზე დიდი სწორედ საბერძნეთშია.
ქართულ-ბერძნული პოლიტიკური ურთიერთობაც ათასწლეულებს ითვლის. ჩვენმა ქვეყნებმა ბევრი ისტორიული ქარტეხილი გამოიარეს და ამ გზაზე ზოგჯერ ერთად ვიარეთ, ზოგჯერ – ცალ-ცალკე თუ ერთმანეთის წინააღმდეგ.
დღეს ჩვენი ურთიერთობა არის კარგი მაგალითი იმისა, თუ როგორ უნდა ითანამშრომლონ თანამედროვე ევროპულმა დემოკრატიულმა სახელმწიფოებმა და ხალხებმა. საბერძნეთი ერთ-ერთი პირველი ევროპული სახელმწიფო იყო, რომელმაც დიპლომატიური ურთიერთობა დაამყარა ახალ საქართველოსთან და თბილისში საელჩო გახსნა. ასე მოვიქეცით ჩვენც და ერთ-ერთი პირველი დიპლომატიური წარმომადგენლობა ათენში დავაფუძნეთ.
სიმბოლური იყო ის ფაქტიც, რომ ევროპაში უვიზო მიმოსვლის დაწყების აღსანიშნავად, საქართველოს პრემიერ-მინისტრი, სტუდენტებთან ერთად, სწორედ საბერძნეთში ჩაფრინდა, ნიშნად იმისა, რომ საქართველოსთვის (და არა მარტო საქართველოსთვის) ევროპა საბერძნეთით იწყება.
საბერძნეთი ჩვენი ევროპული და ევროატლანტიკური მისწრაფებების გამზიარებელი და ქმედითი მხარდამჭერია. ჩვენ აქტიურად ვთანამშრომლობთ ყველა სფეროში, იქნება ეს პოლიტიკური, ეკონომიკური, კულტურული, ჰუმანიტარული თუ სხვა.
ვცდილობთ, კიდევ უფრო გავაღრმავოთ არსებული კავშირები და განვავითაროთ თანამშრომლობის ახალი მიმართულებები; ხელი შევუწყოთ ორ ქვეყანას შორის მეგობრული და საქმიანი კავშირების გამტკიცებას.
ევროკავშირთან თავისუფალი ვაჭრობის შეთანხმებამ საბერძნეთის ბაზარიც გაგვიხსნა და ძალ-ღონეს არ ვიშურებთ, რომ ქართულმა მეწარმეებმა მაქსიმალურად გამოიყენონ ეს შესაძლებლობა. ასევე ვეძებთ მსხვილ ბერძნულ კომპანიებს, რომლებსაც საქართველოში საქმიანობის დაწყების ინტერესი ექნებათ.
ჩვენთვის განსაკუთრებით საინტერესოა ბერძნული გამოცდილებისა და ნოუ-ჰაუს გაზიარება იმ სფეროებში, რომლებშიც საბერძნეთმა დიდ წარმატებას მიაღწია. ესენი გახლავთ – სოფლის მეურნეობა, მდგრადი განვითარება, განახლებადი ენერგია, მწვანე ეკონომიკა, ტურიზმი, აგროტურიზმი და სხვა.
აქტიურად ვცდილობთ ბერძნები დავაინტერესოთ ჩვენი სამთო-სათხილამურო კურორტებით, ღვინის ტურებით, რელიგიური ცენტრების მონახულებით, აგროტურიზმით, კულინარიული მრავალფეროვნებით და სხვა არაერთი მიმართულებით.
ვცდილობთ საბერძნეთში ქართული კულტურის პოპულარიზაციას. ბოლო ერთ წელიწადში ბესიკ ხარანაულის ხეიბარი თოჯინა და ქართული პოეზიის ანთოლოგია ითარგმნა ბერძნულად და გამოიცა. ახლო მომავალში ლაშა ბუღაძის ლიტერატურული ექსპრესის გამოცემაც იგეგმება.
ელადის მიწა ქართველისთვის ოდითგანვე განათლებასთან და სიბრძნესთან რომ ასოცირდებოდა, სიტყვა „საბერძნეთიდანაც“ კარგად ჩანს. საუკუნეების განმავლობაში ჩვენი წინაპრები სწორეთ ბერძნულ სიბრძნესა და წიგნიერებას ეწაფებოდნენ. მიხარია, რომ დღესაც ბევრი ჩვენი ახალგაზრდა ეუფლება ცოდნას საბერძნეთში. თუმცა, მგონია, ამ მიმართულებით მეტის გაკეთება შეიძლება. ვცდილობთ ქართული უნივერსიტეტები ბერძნულ უმაღლეს სასწავლებლებთან დავაკავშიროთ; რათა კიდევ უფრო მეტმა ქართველმა სტუდენტმა მიიღოს განათლება იქ, სადაც ევროპული ცივილიზაციის და დემოკრატიის აკვანი დაირწა.
კიდევ ერთხელ ვულოცავ საბერძნეთის დამოუკიდებლობის დღეს საქართველოში მცხოვრებ ყველა ბერძენს; ყველას, ვისაც გული შეტკივა ამ ქვეყანაზე და უხარია მისი წარმატებები!
დავით დონდუა, ათენი“
კომენტარები