გერმანიაში ქართველ მამაკაცს, რომელმაც ცოლის დაწვა სცადა, სამუდამო პატიმრობა მიუსაჯეს

გერას (ტიურინგია) რეგიონულმა სასამართლომ ქართველ მამაკაცს, რომელმაც ცოლის დაწვა სცადა, ხუთშაბათს, 27 ნოემბერს სამუდამო პატიმრობა მიუსაჯა. თავმჯდომარე მოსამართლემ მამაკაცის ქმედება ფემიციდის მცდელობად შეაფასა. ამის შესახებ გერმანული მედია იუწყება.

47 წლის თენგიზ კაკიაშვილმა მიმდინარე წლის 16 მარტს, დილით ქალაქ გერაში, ტრამვაიში ცოლს ბენზინი გადაასხა და ცეცხლი წაუკიდა. ქალმა სიცოცხლისთვის საშიში დაზიანებები მიიღო. იგი შემთხვევის ადგილიდან ვერტმფრენით გადაიყვანეს საავადმყოფოში. მამაკაცმა მიმალვა მოახერხა, თუმცა მოგვიანებით თავად ჩაბარდა პოლიციას.

სასამართლო პროცესზე ბრალდებულმა დანაშაული აღიარა. საქართველოს მოქალაქე დამნაშავედ ცნეს მკვლელობის მცდელობასა და დამამძიმებელ გარემოებებში ჩადენილ დანაშაულში და სამუდამო პატიმრობა მიუსაჯეს; ამას გარდა, სასამართლომ მას ზარალის ანაზღაურებისთვის 75 000 ევროს გადახდაც დააკისრა. როგორც პროცესზე მოსამართლემ თქვა, ბრალდებულმა ცოლის მოკვლა სცადა იმის გამო, რომ ქალმა განქორწინება მოსთხოვა. ბრალდებულს მიაჩნდა, რომ ქალს დამოუკიდებლად ცხოვრების უფლება არ ჰქონდა.

„თქვენ არ ხართ ურჩხული, თქვენ ხართ ადამიანი, რომელმაც მძიმე დანაშაულები ჩაიდინა, – მიმართა მოსამართლე უვე ტონდორფმა ბრალდებულს. – ქალმა წარმოუდგენელი ტკივილი გადაიტანა, ფსიქიკურად იტანჯება და მთელი ცხოვრება ტრავმირებული იქნება“. მისივე თქმით, მამაკაცმა დარეჯან მ. 15 წლის ასაკში მოიყვანა ცოლად და მათი თანაცხოვრების 30 წლის განმავლობაში ქალი მის დაქვემდებარებაში იყო და კაცი უფროსობდა.

მსჯავრდებული მამაკაცი საქართველოდან გერმანიაში 2018 წელს ჩავიდა, შემდეგ კი მეუღლე და შვილებიც ჩაიყვანა. თავმჯდომარე მოსამართლის თქმით, მამაკაცის ალკოჰოლთან დაკავშირებული პრობლემა უმუშევრობამ კიდევ უფრო გაამწვავა. მიმდინარე წლის იანვარში მან ცოლი თანამშრომელთან რომანში დაადანაშაულა, ამის გამო სცემა და გააუპატიურა. ამის შემდეგ ქალი თავის ქალიშვილთან გადავიდა საცხოვრებლად და ქმართან დაშორება გადაწყვიტა. მამაკაცი მას მოკვლით დაემუქრა და 16 მარტს თავისი მუქარის შესრულება სცადა.

გერმანიის ფედერალური კრიმინალური პოლიციის ცნობით, ქვეყანაში ფემიციდი ყოველ 3 დღეში ერთხელ ხდება. უწყება ქალების მკვლელობას თითქმის ყოველთვის ფემიციდად აფასებს (თუმცა, ფემიციდის განმარტებით, ეს არის ქალის მკვლელობა იმ ნიშნით, რომ იგი ქალია). ამჟამად გერმანიაში ცალკე ფემიციდისთვის სისხლის სამართლის პასუხისმგებლობა არ არსებობს, ამ დანაშაულისთვის მკვლელობის მუხლით ისჯებიან. ძალადობის მსხვერპლ ქალებს შეუძლიათ ყოველდღე, 24 საათის განმავლობაში დაუკავშირდნენ დახმარების სამსახურს ნომერზე 116 016. ზარი უფასოა.

ნინო ხოშტარია

მომხდარის დეტალების შესახებ წაიკითხეთ აქ: გერმანიაში ქართველმა მამაკაცმა ცოლს ბენზინი გადაასხა და ცეცხლი წაუკიდა (ვიდეო)