ძალადობრივი ქსელის, „764“-ის ერთ-ერთი ლიდერი აშშ-ში დააკავეს, მეორე – საბერძნეთში – რა შეტყობინებებს უგზავნიან „ჩატებში“ ბავშვებს
აშშ-ის გამოძიების ფედერალური ბიურო საგანგაშო გაფრთხილებას ავრცელებს მშობლებისთვის მთელი მსოფლიოს მასშტაბით
47 წლის რიჩარდ დენსმორი ბავშვთა სექსუალური ექსპლუატაციისთვის უკვე 30-წლიან სასჯელს იხდის. მას გასული წლის ნოემბერში მიესაჯა მაქსიმალური სასჯელი ჩადენილი დანაშაულებისთვის. მიჩიგანის შტატში მცხოვრები მამაკაცი ნეონაცისტური და ძალადობრივი ქსელის ერთ-ერთი გავლენიანი წევრია. „764“ – ასე ჰქვია ინტერნეტსივრცეში მოქმედ კრიმინალურ დაჯგუფებას, რომელიც სამიზნე ობიექტებს სოციალურ ქსელებსა და პოპულარულ სათამაშო პლატფორმებზე არჩევს. ისინი აკვირდებიან მოზარდებს X-ზე, Instagram-ზე, Facebook-ზე და განსაკუთრებით ონლაინ თამაშებში.
„რობლოქსი“, „მაინქრაფთი“, „დისქორდი“ – ეს იმ სათამაშო ინტერნეტპლატფორმების არასრული ჩამონათვალია, რომელთა გამოყენებით ასობით ბავშვი სექსუალური ექსპლუატაციის, კიბერბულინგის, გამოძალვისა და თვითდაზიანების სამიზნე გახდა. ამერიკის იუსტიციის დეპარტამენტი და გამოძიების ფედერალური ბიურო ავრცელებს საგანგაშო გაფრთხილებას მშობლებისთვის მთელი მსოფლიოს მასშტაბით: გამოძიების ინფორმაციით, 9-იდან 16 წლამდე ასაკის გოგონები და ბიჭები შესაძლოა კიბერთავდასხმის პოტენციური მსხვერპლი გახდნენ. დაჯგუფება სახელწოდებით „764“ ბავშვებთან კომუნიკაციის დასამყარებლად სწორედ პოპულარულ ინტერნეტთამაშებს იყენებს.
15 წლის გოგონას დედა ჰყვება, თუ როგორ აიძულებდნენ მის შვილს ჯერ შინაური ცხოველის მოკვლას, შემდეგ კი თვითდაზიანების მიყენებას. დაჯგუფების წევრებმა მას სხეულზე დანით ორგანიზაციის სახელწოდების – „764“-ის ამოტვიფვრაც აიძულეს.
კიდევ ერთი მსხვერპლი ადასტურებს, რომ მოზარდს „764“-ის წევრებმა, სხვა დავალებებთან ერთად, თვითმკვლელობისთვის ინსტრუქცია გაუგზავნეს. გამოძიების ფედერალური ბიურო უმაღლესი დონის განგაშს აცხადებს.
უფროსი გამომძიებელი დევიდ სკოტი, რომელიც კოორდინაციას უწევს დანაშაულებრივ ქსელთან დაკავშირებულ საქმეებს, ამბობს, რომ „764“-ის სახელით ცნობილი ტრანსნაციონალური დაჯგუფება, თავისი მასშტაბით, უპრეცედენტო საფრთხეს წარმოადგენს.
სათამაშო პლატფორმებზე შექმნილ ჯგუფებში და დახურულ „ჩატებში“, მოზარდები ზოგჯერ საკუთარი დროის უდიდეს ნაწილს ატარებენ. ხშირად თამაშში მათ უცხო ადამიანებიც უერთდებიან და პოტენციური დამნაშავის პირველი კონტაქტიც შესაძლოა სწორედ ერთი შეხედვით უწყინარი თამაშის დროს მოხდეს. ონლაინ თამაშები მსოფლიოს არაერთი ქვეყნის მსგავსად, პოპულარულია საქართველოშიც.
როგორ უნდა ამოიცნოს მშობელმა, რომ ონლაინ თამაშებში ჩართული მისი შვილი შესაძლოა დამნაშავის ერთ-ერთი სამიზნე იყოს? მანდატურის სამსახურის ფსიქოლოგი ელენე ყიფიანი იმ მთავარ ფაქტორებზე საუბრობს, რომელიც ოჯახისთვის განგაშის სიგნალი უნდა გახდეს.
ინტერნეტსივრციდან მომდინარე საფრთხეების შემცირება ერთ-ერთი მთავარი პრიორიტეტია სპეციალური საგამოძიებო სამსახურისთვისაც. „764“-ის სახელით მოქმედი საერთაშორისო ქსელის საქმიანობა საქართველოში არ ფიქსირდება, თუმცა საგამოძიებო სამსახურში გვეუბნებიან, რომ ინტერნეტსივრცეში განსაკუთრებით გახშირდა მოზარდების მიმართ შანტაჟის, მუქარისა და სექსუალური ექსპლუატაციის ფაქტები. უწყება მანდატურის წარმომადგენლებთან ერთად სკოლებში პრევენციულ ღონისძიებებსაც ატარებს. მოსწავლეებს, მშობლებსა და მასწავლებლებს უტარებენ ტრენინგს, თუ როგორ უნდა დაიცვან ბავშვები.
„მსოფლიოს ნებისმიერ წერტილში ვიპოვით და პასუხს ვაგებინებთ ყველას, ვინც დაუცველი ბავშვების შემზარავ ტერორშია ჩართული“, – ეს შეერთებული შტატების გენერალური პროკურორის სიტყვებია. ტრანსნაციონალური დანაშაულებრივი დაჯგუფების ორი ლიდერი გასულ კვირას დააკავეს: ერთი – შეერთებულ შტატებში, ერთი კი – საბერძნეთში. თავად დაჯგუფების შემქმნელი ბრედლი კადენჰედი, ბავშვთა პორნოგრაფიის რამდენიმე ბრალდების აღიარების შემდეგ, 80-წლიან პატიმრობას იხდის. ცნობილია, რომ მან კრიმინალური ქსელი 15 წლის ასაკში დააფუძნა სათამაშო პლატფორმა „დისქორდზე“ , სახელწოდებად კი საკუთარი საცხოვრებლის საფოსტო ინდექსი – 764 შეარჩია. ქსელს მსოფლიოს მასშტაბით ამჟამადაც ასობით მიმდევარი ჰყავს.
კომენტარები