სამივე სინჯის მედალი პირველივე დღეს ევროპის ჩემპიონატიდან

საქართველოს 23-წლამდელთა ნაკრებმა პოლონეთის ქალაქ პილაში მიმდინარე ევროპის ჩემპიონატზე ძიუდოში პირველივე საშეჯიბრო დღეს, 15 ნოემბერს თავისი მონაგარი სამივე სინჯის მედლით შეავსო.

ევროპის ჩემპიონი გახდა გიორგი ტერაშვილი (73 კგ), რომელმაც ფინალში უნგრელი მეტოქე 22 წამში დაამარცხა იპონით და საქართველოს ნაკრებს ტურნირზე ოქროს მედალი მოუტანა.

ვერცხლის მედლის მფლობელი გახდა 19 წლის ნინო ლოლაძე (57 კგ), რომელიც ფინალურ შეხვედრაში  აზერბაიჯანელ მოწინააღმდეგესთან დამარცხდა.

ბრინჯაოს მედალი კი თენგიზ ზირაქაშვილმა (66 კგ) მოიპოვა, რომელმაც ტურნირზე მესამე ადგილისთვის ბრძოლაში პოლონელ მეტოქეს სძლია. შეგახსენებთ, რომ თენგო ზირაქაშვილი 2023 წელს 20-წლამდელთა შორის ევროპის ჩემპიონი გახდა.

ტურნირის მეორე საშეჯიბრო დღეს, 16 ნოემბერს კონტინენტის პირველობაზე შვიდი ქართველი იასპარეზებს.

23-წლამდელთა ევროპის ჩემპიონატზე ძიუდოში პოლონეთში საქართველოს ნაკრები 14 სპორტსმენით დაკომპლექტებული გუნდით ჩავიდა, რომელთაგან 9 ვაჟია, 5 კი – გოგონა.

ტურნირის ბოლო დღეს, 17 ნოემბერს შერეული გუნდური შეჯიბრება გაიმართება.

ნუცა ყაველაშვილი