ძიუდო: გურამ თუშიშვილი მსოფლიოს ვიცე-ჩემპიონი გახდა

აბუ-დაბიში მიმდინარე მსოფლიოს ჩემპიონატზე, ინდივიდუალური ასპარეზობების ბოლო დღეს მძიმეწონოსანი (+100) გურამ თუშიშვილი ვერცხლის მედალს დაეუფლა.

თუშიშვილი ფინალში სამხრეთკორეელ კიმს შეხვდა. 29 წლის ქართველ ძიუდოისტს შანსი ჰქონდა, მეორედ გამხდარიყო მსოფლიო ჩემპიონი, თუმცა დამარცხდა და ვიცე-ჩემპიონობას დასჯერდა. მსოფლიო ჩემპიონატის ოქროს მედალი გურამ თუშიშვილს  2018 წელს აქვს მოგებული ბაქოში.

ინდივიდუალური შეჯიბრებების დასრულების შემდეგ საქართველოს ნაკრების ანგარიშზე ოთხი მედალია – ჩვენს ნაკრებს ოქროს ჯილდოები გიორგი სარდალაშვილმა (60 კგ) და ტატო გრიგალაშვილმა (81 კგ) მოუტანეს, გურამ თუშიშვილმა (+100) ვერცხლის მედალი მოიპოვა, ხოლო ვაჟა მარგველაშვილმა (66 კგ) – ბრინჯაო.

ხვალ, 24 მაისს გუნდური შეჯიბრება გაიმართება, რომელშიც საქართველოს ნაკრებიც ჩაერთვება.

აღსანიშნავია, რომ აბუ-დაბიში ესპანეთის სახელით მოასპარეზე ქართველმა ძიუდოისტებმა – ნიკოლოზ შერაზადიშვილმა (100 კგ) და ტრისტან მოსახლიშვილმა (90 კგ) ბრინჯაოს მედლები მოიპოვეს.