ხელოვანი დების – ქეთი და ნინო უძილაურების შემოქმედებითი საღამო ათენში (ფოტო, ვიდეო)

გასულ კვირას, 8 ოქტომბერს ათენის ცენტრში, პატისიონზე, გალერეაში ხელოვანი დების – ქეთი და ნინო უძილაურების შემოქმედებითი საღამო გაიმართა. სტუმრებს საშუალება ჰქონდათ, ქეთის ნახატების პერსონალური გამოფენა დაეთვალიერებინათ და ნინოს პოეზიას გასცნობოდნენ.

ამ ღონისძიებისთვის საქართველოს მწერალთა კავშირის წევრი, პოეტი ნინო უძილაური სპეციალურად ჩამოვიდა თბილისიდან ათენში, ხოლო მისი მხატვარი და – ქეთი კი უკვე წლებია, საბერძნეთის დედაქალაქში ცხოვრობს.

შემოქმედებით საღამოზე მოწვეულ სტუმრებს შორის იყვნენ საბერძნეთის რესპუბლიკაში საქართველოს ელჩის მოვალეობის შემსრულებელი დეა მუმლაძე და მისი მოადგილე ანი უძილაური.

საღამომ ძალიან თბილ და სასიამოვნო ვითარებაში ჩაიარა. ღონისძიებაზე სტუმრებმა სამახსოვრო ფოტოები გადაიღეს.

ჟურნალისტმა და მხატვარმა ნინო ბაჯელიძემ ქეთი უძილაურთან, როგორც ემიგრანტ ხელოვანთან, ექსკლუზიურად ჩვენი საიტისთვის ინტერვიუ ჩაწერა.

„ამ ქვეყანამ მე გამზარდა… მხარდაჭერაც მქონდა ბერძნებისგან, საკუთარი თავის ფასი მასწავლეს. მე შევძელი ხატვა, მაგრამ … ვინც არ უნდა იყოს… ნუ იკეტებით, რაც შეგიძლიათ, გააკეთეთ, თქვენი თავისთვის გააკეთეთ!..

ეს [საბერძნეთი] ჩემი ქვეყანაა, მაგრამ მე სამშობლო მაქვს… ჩემს სამშობლოში როგორ დავბრუნდები – ამაზე ვმუშაობ…“ – ამბობს ქეთი უძილაური ინტერვიუში.