გარდაიცვალა დამლაგებელი, რომელიც მეუფე შიოს სამუშაო ოთახს ასუფთავებდა – უკავშირდება თუ არა მისი გარდაცვალება პატრიარქის ტახტის მოსაყდრის მოწამვლის ვერსიას

„ჩვენი ინფორმაციით, საპატრიარქოში ეჭვობენ, რომ პატრიარქის თანამოსაყდრეს დროთა განმავლობაში, ეტაპობრივად წამლავდნენ“, – ნათქვამია „რუსთავი 2-ის“ ვებსაიტზე გამოქვეყნებული ინფორმაციაში.

საპატრიარქოს ტელევიზია „ერთსულოვნებისთვის“ მიცემულ ინტერვიუში ანდრია ჯაღმაიძე  არ გამორიცხავს პატრიარქის მოსაყდრის მოწამვლის შესაძლებლობას. მისი თქმით, დაახლოებით ერთი თვის წინ ჩატარებული გამოკვლევების შედეგად მიტროპოლიტის ორგანიზმში „მძიმე მეტალები აღმოაჩინეს“.

(საუბარია სისხლში აღმოჩენილ მძიმე მეტალებზე, მათ შორის, დარიშხანზე, რომელიც მომაკვდინებელ საწამლავ საშუალებად ითვლება. რედ.)

შეკითხვაზე, როგორ შეიძლებოდა საპატრიარქოში, რომელიც დაცული ორგანიზაციაა, მსგავსი სავარაუდო ქმედება განხორციელებულიყო, ჯაღმაიძე  პასუხობს:

„ყველა ჩვენი ვარაუდის ასე ხმამაღლა თქმაც არ მინდა, თუმცა ერთს ვიტყვი, რომ იმდენად დიდი ხსნის ისტორია აქვს ამგვარ ქმედებებს და იმდენად დახელოვნებულია ამაში ის ხალხი, ვინც აკეთებს, იმდენად შორს არის წასული ამის საშუალებები, რომ ძალიან ძნელია წინასწარ ყველაფერი გათვალო და გაითვალისწინო“.