ჯო ბაიდენი მოულოდნელად კიევში ჩავიდა, ვიზიტის შესახებ წინასწარ არ განუცხადებიათ (ვიდეო)

 დილიდან კიევში უსაფრთხოების განსაკუთრებული ზომები მიიღეს, გადაიკეტა რამდენიმე მთავარი ქუჩა, რკინიგზა, აგრეთვე,  ამერიკის საელჩოს ტერიტორია, გამარჯვების მოედანი, ლესია უკრაინკას ბულვარი.

„თქვენი ვიზიტი მხარდაჭერის უაღრესად მნიშვნელოვანი ნიშანია ყველა უკრაინელისათვის“, – მიმართა ზელენსკიმ უკრაინაში მყოფ ჯო ბაიდენს. ორმა პრეზიდენტმა 9 წლის განმავლობაში (2014 წლის შემდეგ) რუსეთთან ომში დაღუპული უკრაინელი ჯარისკაცების ხსოვნის მემორიალი მოინახულა.

„კარგია კიევში დაბრუნება. ვფიქრობდი, ეს კრიტიკულად მნიშვნელოვანი იყო, რომ ეჭვის ნატამალიც არ არსებობდეს უკრაინისათვის ამერიკის მხარდაჭერაში. უკრაინელმა ხალხმა აჩვენა ის, რაც მანამდე ისტორიის მანძილზე ცოტას თუ უჩვენებია. მიუხედავად იმ აზრთა სხვადასხვაობისა, რაც კონგრესში არსებობს სხვადასხვა საკითხთან დაკავშირებით, მნიშვნელოვანი შეთანხმება გვაქვს უკრაინის მხარდაჭერის საკითხზე. არ ვსაუბრობთ მხოლოდ უკრაინის თავისუფლებაზე, ვსაუბრობთ თავისუფლებასა და დემოკრატიაზე უფრო ფართო მასშტაბით“, – განაცხადა ჯო ბაიდენმა.

მან ხაზგასმით აღნიშნა, რომ მიუხედავად მაშინ არსებული მოლოდინისა, კიევი არ დაცემულა საომარი მოქმედების დაწყებიდან ერთი წლის შემდეგაც.

„… ერთი წლის წინ, იმ ბნელ ღამეს მსოფლიო, ფაქტობრივად, კიევის დაცემისთვის ემზადებოდა. ერთი წლის შემდეგ კიევი დგას, უკრაინა დგას, დემოკრატია დგას. ამერიკა და მთელი მსოფლიო თქვენ გვერდით დგანან“, – განაცხადა ჯო ბაიდენმა.

აშშ-ის პრეზიდენტმა ისევ დაადასტურა, რომ  ამერიკა უკრაინას მიაწოდებს „იმდენ დახმარებას, რამდენიც მას დასჭირდება“. მისივე თქმით, „პუტინის დამპყრობლური ომი უკრაინაში დამარცხებისკენ მიდის“.

„ევროპეისკაია პრავდას“ ცნობით, კიევში ვიზიტისას ჯო ბაიდენმა უკრაინის დახმარების ახალი პაკეტი და რუსეთის მიმართ ახალი სანქციები დააანონსა.

ბაიდენმა კიევში დაახლოებით 5 საათი დაყო, დაღუპული ჯარისკაცების მემორიალის მონახულების გარდა იგი აშშ-ის საელჩოს თანამშრომლებსაც შეხვდა.

რუსეთმა უკრაინაში ფართომასშტაბიანი ომი გასული წლის 24 თებერვალს დაიწყო. საომარი მოქმედებები უკვე ერთი წელია, მიმდინარეობს და ვერავინ ამბობს დაზუსტებით, კიდევ რამდენ ხანს შეიძლება გაგრძელდეს.

როგორც „ესოშიეიტედ პრესი“/AP წერს, ბაიდენის ვიზიტი მიზნად ისახავდა დასავლეთის ქვეყნების ერთიანობის შენარჩუნება უკრაინის დასახმარებლად იმ ფონზე, რომ გაზაფხულის დადგომასთან ერთად, დიდი ალბათობით, საომარი მოქმედებები გაძლიერდება.

ამავე წყაროს ცნობით, ჯო ბაიდენის ვიზიტამდე ამერიკელი ჩინოვნიკები რუსეთის მხარეს დაუკავშირდნენ, რათა თავიდან აეცილებინათ ნებისმიერი მომენტი, რომელსაც შეიძლება ორ ბირთვულ სახელმწიფოს შორის პირდაპირი კონფლიქტი გამოეწვია.

ნიკო აბაშიშვილი