რომის პაპი – ქართველები იმსახურებენ უფრო ფართო შესაძლებლობებს, ქართველი ხალხი ახერხებდა, წინააღმდეგობა გაეწია სირთულეებისთვის, რაც კულტურისა და რწმენის დამსახურებაა

რომის პაპმა სულხან-საბა ორბელიანის უნივერსიტეტის დელეგაციას უმასპინძლა და მოუწოდა, გამოიყენონ განათლება და რწმენა, რათა ებრძოლონ სიბნელეს, გულგრილობასა და სიძულვილს. ამის შესახებ ინფორმაციას „ვატიკან ნიუსი“ ავრცელებს.

როგორც პრესრელიზშია აღნიშნული, რომის პაპმა, ფრანცისკემ საქართველოდან ვატიკანში ჩასული დელეგაციის წევრებისადმი სიტყვით მიმართვისას ყურადღება გაამახვილა ახალგაზრდების განათლების მნიშვნელობაზე.

„განათლება ეხმარება ახალგაზრდა თაობას ზრდაში და ყველაზე ნაყოფიერი ფესვების გაზრდაში“, – განაცხადა ფრანცისკემ.

პონტიფიკოსმა ასევე ისაუბრა საქართველოს შესახებ და განაცხადა, რომ ეს ახალგაზრდა სახელმწიფოა, რომელსაც უძველესი ისტორია აქვს.

„თავის სიტყვაში ფრანცისკემ ასევე ყურადღება გაამახვილა ქართულ სიტყვა „განათლებაზე“, რომელიც, პონტიფიკოსის თქმით, მომდინარეობს სიტყვიდან „ნათელი“. რომის პაპის თქმით, განათლებას შეუძლია, შეცვალოს ყველაფერი, ისევე როგორც სინათლეს ბნელ ოთახში შეუძლია, ნათელი მოჰფინოს ყველა საგანს.

„საქართველოს ისტორია ასევე აღსავსეა სიბნელიდან სინათლეში გადასვლის მაგალითებით, როდესაც ქვეყანა ახერხებდა სინათლეში ყოფნას მძიმე დროს, რაც დაკავშირებული იყო უცხოელ დამპყრობლებთან, ქართველი ხალხი ახერხებდა, წინააღმდეგობა გაეწია ამ სირთულეებისთვის და ეს კულტურისა და რწმენის დამსახურებაა. ქართველები, ახალგაზრდებით დაწყებული, იმსახურებენ უფრო ფართო შესაძლებლობებს. ამასთან, ტიპური ქართული ჰუმანიზმი, მისი უნიკალური სილამაზით იმსახურებს, რომ ის დააფასონ სხვა ადგილებშიც, ხოლო ქართული ხელოვნება, მუსიკა და სხვა გამომსახველობითი ფორმები, კიდევ უფრო გამდიდრდებოდა სხვა კულტურებთან პატივისცემით განმსჭვალული ურთიერთობის შედეგად. მაგალითის სახით, აქაც სინათლეს მოვიშველიებ, რომელიც იმისთვის კი არ არსებობს, რომ თვითონ გამოჩნდეს, არამედ იმისთვის, რომ სხვას გაუნათოს ირგვლივ და მის იქით არსებული სივრცე. ასეა კულტურაც, რომელიც ახალ ჰორიზონტებს ხსნის და საზღვრებს აფართოებს“, – განაცხადა რომის პაპმა.

1tv.ge