გაერო: მსოფლიოს მოსახლეობამ 8 მილიარდს გადააჭარბა

მსოფლიო მოსახლეობამ 8 მილიარდს გადააჭარბა, გაეროს ოფიციალური შეფასებით, ეს არის „მნიშვნელოვანი ეტაპი კაცობრიობის განვითარებაში“ და შეგვახსენებს, რომ „ჩვენი საერთო პასუხისმგებლობაა ზრუნვა ჩვენს პლანეტაზე“.

გაეროს განცხადებით, „ეს უპრეცედენტო ზრდაა“ – 1950 წელს დედამიწაზე 2,5 მილიარდი ადამიანი ცხოვრობდა, დაახლოებით 70 წელში კი 3-ჯერ და მეტად გაიზარდა, ეს არის „სიცოცხლის ხანგრძლივობის თანდათანობითი ზრდის, საზოგადოებრივი ჯანმრთელობის, კვების, ჰიგიენისა და მედიცინის სფეროში პროგრესის შედეგი“.

1800 წლამდე დედამიწაზე მილიარდზე ნაკლები ადამიანი ცხოვრობდა, მეოცე  საუკუნის ბოლოსთვის – 1999 წლის 12 ოქტომბერს მოსახლეობის რაოდენობამ 6 მილიარდს მიაღწია, 7 მილიარდს – 2011 წლის 31 ოქტომბერს (12 წლის შემდეგ), 8 მილიარდს – 11 წლის შემდეგ,  2022 წლის 15 ნოემბერს.

დღეისათვის ჩვენი პლანეტის მოსახლეობის უდიდესი ნაწილი აზიასა და აფრიკაში ბინადრობს, მესამედზე მეტი მოდის ორ ქვეყანაზე – ჩინეთსა და ინდოეთზე. გაეროს შეფასებით, ჩინეთში დღეს პლანეტის მოსახლეობის 17,9% (1,43 მლრდ ადამიანი) ცხოვრობს, ინდოეთში – 17,8% (1,42 მლრდ ადამიანი).

გაეროს პროგნოზით, დემოგრაფიული ზრდა ნელდება და დედამიწის მოსახლეობა 9 მილიარდს 2037 წელს მიაღწევს, 10 მილიარდს – 2058 წელს; ამ საუკუნეში ჩვენი პლანეტის მოსახლეობის რაოდენობის „პიკი“ – 10,4 მილიარდი 2080 წელს დაფიქსირდება და შემდეგ სტაგნაცია იქნება საუკუნის ბოლომდე.

მოსახლეობის ზრდა დიდ გამოწვევებს უქმნის ღარიბ ქვეყნებს. დღეს 8-მილიარდიან მსოფლიოში 10-დან 1-ზე მეტი ადამიანი (828 მილიონი) შიმშილობს და ეს მდგომარეობა კიდევ უფრო გაამწვავა კლიმატის ცვლილებამ, კოვიდპანდემიამ და ომმა.

Coldiretti-ს მიერ ჩატარებული ანალიზის თანახმად, მსოფლიოში დაახლოებით 2,3 მილიარდი ადამიანი ანუ 29,3%, საშუალო ან მძიმე კვებითი დაუცველობის პირობებში ცხოვრობს; დადგენილია, რომ ხუთ წლამდე ასაკის 45 მილიონი ბავშვი გამოფიტულია, ხოლო ხუთ წლამდე ასაკის 149 მილიონი ბავშვის განვითარება დაქვეითებულია იმის გამო, რომ მათ რაციონში აუცილებელი საკვები ნივთიერებების ქრონიკული ნაკლებობაა.

ნინო ხოშტარია