fbpx
საზოგადოებაქართველები უცხოეთშიხელოვნებასაქართველო

თამარ გვერდწითელი 58 წლის გახდა – რას შეეწირა მომღერლის პირადი ცხოვრება?

დღეს ცნობილი ქართველი მომღერალი, საქართველოს, რუსეთის და ინგუშეთის სახალხო არტისტი თამარ გვერდწითელი 58 წლის გახდა. მისი პროფესიული მოღვაწეობა საკმაოდ წარმატებულად აეწყო. იგი 40 წელზე მეტია, სცენაზე დგას და მუსიკა მისი ცხოვრების აზრად იქცა, თუმცა წაართვა ის, რასაც პირადი ბედნიერება ქვია.

მუსიკოსს დიდება ბავშვობის წლებში ეწვია – 9 წლის ასაკში საბავშვო ანსამბლის წევრი გახდა და „მზიურთან“ ერთად გასტროლებით მთელი მსოფლიო მოიარა. ჯერ კიდევ თბილისის სახელმწიფო კონსერვატორიაში სწავლის დროს, 19 წლის გოგონა სოჭის საერთაშორისო მუსიკალური კონკურსის, „ოქროს ორფეოსის“ გამარჯვებული გახდა, შემდეგ კი სოპოტისა და სან რემოს ფესტივალებზე მოწვეული სტუმრის სტატუსით მონაწილეობდა. ამის შემდეგ თამარ გვერდწითელზე, როგორც საბჭოთა კავშირში ერთ-ერთ ყველაზე ნიჭიერ მომღერალზე, ევროპაშიც ალაპარაკდნენ.

ერთხელ ცნობილმა ფრანგმა მომღერალმა და კომპოზიტორმა მიშელ ლეგრანმა თავისი „შერბურული ქოლგების“ გვერდწითელისეული შესრულება მოისმინა და იმდენად მოიხიბლა, რომ მომღერალი პარიზში მიიწვია. თითქოს საფიქრალი არაფერი იყო, რადგან ასეთი შანსი ადამიანს ცხოვრებაში ერთხელ ეძლევა, თუმცა თამრიკოს ფიქრის მიზეზი ნამდვილად ჰქონდა. იმ დროისთვის ის რეჟისორ გიორგი კახაბრიშვილის ცოლი იყო და შვილი, სანდრო ჰყავდა. თამრიკო ყოველთვის მყარ ოჯახზე ოცნებობდა, რადგან ბავშვობაში მშობლების განქორწინება ძალიან მძიმედ განიცადა. მას შემდეგ ის ყოველთვის ეძებდა საიმედო მამაკაცს, რომელიც მისი მფარველი და მხარდამჭერი გახდებოდა. ალბათ ამიტომაც შეაჩერა ყურადღება 15 წლით უფროს რეჟისორზე.

ქორწილი ძალიან პომპეზური იყო. მოწვეულ სტუმრებს შორის საქართველოში საქმიანი ვიზიტით მყოფი მარგარეტ ტეტჩერიც კი გახლდათ. ამის ინიციატორი ედუარდ  შევარდნაძე იყო, რომელმაც მაღალი რანგის სტუმარი თბილისის ქორწინების სახლის გახსნაზე მიიწვია. პოლიტიკოსები ადგილზე სწორედ თამარ გვერდწითელისა და გიორგი კახაბრიშვილის ქორწინების რეგისტრაციის დროს მივიდნენ.

თავიდან მათი ქორწინება ბედნიერი იყო. როგორც ყველა ქართველი ქალი, თამრიკოც ოჯახს დიდ დროს უთმობდა. კახაბრიშვილი თავადაც ხელოვანი იყო, ამიტომ თავიდან ცოლის მუსიკალურ კარიერას არ ეწინააღმდეგებოდა.

„მე კარგი დიასახლისი ვიყავი და თავიდან ყველაფერი კარგად იყო. ჩემი მშობლების განქორწინება ძალიან მტკიცნეულად განვიცადე და ამის გამეორება არ მინდოდა“, – აღიარა მომღერალმა.

80-იანი წლების ბოლოს წყვილის ურთიერთობა ნელ-ნელა გაცივდა. როდესაც საქართველოში სამოქალაქო დაპირისპირება დაიწყო, აღმოჩნდა, რომ ცოლ-ქმარი ბარიკადების სხვადასხვა მხარეს იდგა. იმ დროს მომღერალი ასე იხსენებს: „მილიონობით ადამიანი სახლის, პროფესიის და ყოველგვარი დროის შეგრძნების გარეშე დარჩა… ომი არავის სურს… ის ანგრევს ჩვეულ რიტმს და ადამიანი თავს უსარგებლოდ გრძნობს“.

თამარ გვერდწითელი მიხვდა, რომ ასეთ პირობებში მუსიკალური კარიერის გაგრძელებას ვერ შეძლებდა და მიშელ ლეგრანის მიწვევას დათანხმდა. ფრანგ კომპოზიტორთან შეხვედრის შემდეგ სრულიად დარწმუნებული იყო, რომ მუსიკა მისი ცხოვრების არჩევანია და აქედან წასვლა არ შეიძლება. „ოლიმპიაში“ ჩატარებული კონცერტის შემდეგ მომღერალს საფრანგეთში ორწლიანი მუშაობის კონტრაქტი შესთავაზეს. ამ ხნის განმავლობაში ის მიშელ ლეგრანთან ერთად სცენაზე გამოდიოდა, შემდეგ კი დაბრუნდა, მაგრამ თბილისის ნაცვლად – მოსკოვში და დედა და შვილიც თან წაიყვანა.

გვერდწითელი რამდენიმე წელი ელოდა, რომ რეჟისორი ქმარი მოსკოვში, ცოლ-შვილთან  ჩავიდოდა, მაგრამ იგი უარზე იყო და ამბობდა, რომ სამშობლოსა და თავისი საქმის მიტოვება არ შეუძლია. ბოლოს მომღერალი მიხვდა, რომ ქმარს მისი დაკარგვა არაფრად უღირდა და 1995 წელს განქორწინების შესახებ განაცხადა.

იმავე წელს თამარ გვერდწითელი ამერიკაში, გასტროლებზე გაემგზავრა და იპოვა სიყვარული, რომელსაც დღეს ყველაზე ღრმა და ძლიერ გრძნობას უწოდებს. დიმიტრი აზერბაიჯანელი ემიგრანტი იყო, რომელმაც ამერიკაში ადვოკატის კარიერა შეიქმნა. დიმიტრი ქალისგან არ მოითხოვდა კარიერაზე უარის თქმას და მზად იყო მასთან ერთად მსოფლიოს ერთო კუთხიდან მეორეში გასტროლებზე ევლო. „ჩემი გულისთვის ყველაფრისთვის მზად იყო. იმაზეც კი, რომ ბოსტონი დაეტოვებინა და მოსკოვში ეცხოვრა. უარი ვთქვი მისთვის შვილის გაჩენაზე და ამაშიც გამიგო. სიყვარულის გამო ყველაფისთვის მზად იყო“, – ამბობს მომღერალი.

ერთად ორი წელი გაატარეს, მაგრამ ლამაზი სიყვარულის ამბავი მოულოდნელად და ტრაგიკულად დასრულდა – გვერდწითელი მოსკოვში იყო, როცა შუაღამეს ამერიკიდან დაურეკეს და აცნობეს, რომ დიმიტრი გულის შეტევით გარდაიცვალა. სასოწარკვეთილი ქალისთვის მუსიკა ერთადერთ შვებად იქცა. „მუსიკა ჩემთვის ერთადერთი შვებაა, როცა ძალიან მტკივა“, – აღნიშნა გვერდწითელმა ერთ-ერთ ინტერვიუში.

თამარ გვერდწითელი მეორე ქმართან, სერგეი ამბატიელოსთან ერთად

წლების შემდეგ გვერდწითელმა ოჯახის შექმნა კიდევ ერთხელ სცადა და ცოლად კარდიოქირურგს, სერგეი ამბატიელოს გაჰყვა, მაგრამ ქორწინება ხანმოკლე აღმოჩნდა და წყვილი 2005 წელს ერთმანეთს დაცილდა. მომღერალი მომხდარის მიზეზებზე არასოდეს საუბრობს, მაგრამ აღიარებს, რომ ეს ქორწინება შეცდომა იყო.

„ვცდილობდი მარტოობას და დაკარგულ სიყვარულზე ფიქრს გავქცეოდი და უპატიებელი შეცდომა დავუშვი. ჩემს ცხოვრებაში შემოვუშვი ადამიანი, რომლის ადგილი იქ არ იყო. ამ ადამიანს, რომელმაც ვერც მე და ვერც ჩემს განცდებს გაუგო, სახელითაც კი არასოდეს მოვიხსენიებ“, – ამბობს მომღერალი.

შვილთან ერთად

თამარ გვერდწითელის თქმით, ამის შემდეგ მისი ცხოვრების ერთადერთი მამაკაცი შვილია. მან თავი მთლიანად სცენას მიუძღვნა, რომლისთვისაც ძალიან დიდი საფასური გადაიხადა.

თარგმნა „პროგრესნიუსმა“

 

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close