თიკა სვანიძე-ვენკო: „მუდამ ვიქნები სულიერად დაკავშირებული საქართველოსთან“

10 მარტს თბილისში, მარჯანიშვილის თეატრში ემიგრანტებისთვის მიძღვნილი საღამო გაიმართება. არაერთ საინტერესო სტუმარს შორის იქნება ამსტერდამში მცხოვრები ჩვენი თანამემამულე თიკა სვანიძე-ვენკოც, რომელიც ნიდერლანდებში საქართველოს და ქართული კულტურის პოპულარიზაციისთვის იღვწის, მის მიერ დაარსებული ქართული კულტურის ცენტრი უამრავ საინტერესო პროექტს ახორციელებს. სწორედ თიკას ტურისტული კომპანიის, TIKA TOURS-ის ორგანიზებით ჩამოვიდა რამდენიმე წლის წინათ საქართველოში 18 ჰოლანდიელი ჟურნალისტი, რომლებმაც ჩვენს ქვეყნას დიდი რეკლამა გაუწიეს.

თიკა, ბიზნესვუმენობა თავიდანვე გინდოდათ?

ვერ გეტყვით… მრავალფეროვანი ინტერესის ობიექტი მქონდა, მათ შორის, მუსიკა, ცეკვა, მოგზაურობა და სხვა. ყოველთვის ვეცნობოდი სხვადასხვა ქვეყნის კულტურას, შესაბამისად, ამ მრავალფეროვანმა ინტერესმა ჩემს ცნობიერებაზე დიდი გავლენა იქონია. კარიერის დასაწყისში ფორტეპიანოს პედაგოგიც კი ვიყავი.

რა პროფესიის ხართ?

თბილისის სახელმწიფო უნივერსიტეტის უცხო ენების ფაკულტეტზე ვსწავლობდი, შემდეგ ჰოლანდიაში, გრონინგენის უნივერსიტეტში (ნიდერ. Rijksuniversiteit Groningen) აღმოსავლეთ ევროპის კვლევების და ტურიზმის ფაკულტეტზე გადავწყვიტე სწავლის გაგრძელება. პარალელურად დიდი პრაქტიკული გამოცდილება მივიღე: ნიდერლანდების სამეფოში სწავლის პერიოდში ქართულ-რუსულ-ნიდერლანდური ენების სერტიფიცირებული მთარგმნელ-თარჯიმანი გავხდი, რაც არა მარტო ჩემი შემოსავლის წყაროდ იქცა, არამედ ბევრი ქართველი არალეგალი ემიგრანტის დასახმარებლადაც გამომადგა მათი ოფიციალურ სტრუქტურებთან ურთიერთობებისას და ლტოლვილებთან დაკავშირებული პროცედურებისას.

ვიცი, რომ სრულიად საქართველოს კათოლიკოს-პატრიარქის, უწმინდესისა და უნეტარესის, ილია მეორის ნიდერლანდების სამეფოში ოფიციალური ვიზიტის დროს ღონისძიებების ორგანიზატორი თქვენ იყავით.

დიახ და ეს დიდი პატივი იყო ჩემთვის. პატრიარქთან შეხვედრა და უწმინდესის მასპინძლობა, რა თქმა უნდა, ჩემი ცხოვრების მნიშვნელოვანი და გარდამტეხი ეტაპი გახდა ემიგრაციაში (სულიერებას ვგულისხმობ). ამასთან ერთად, კიდევ ერთი დასამახსოვრებელი მოვლენა მოხდა ჩემს ცხოვრებაში სანკტ-პეტერბურგის სახელმწიფო უნივერსიტეტში სტაჟირებისას, სადაც ჰოლანდიიდან ჩავედი. პეტერბურგში აქტიურად ვმონაწილეობდი ნიდერლანდების სამეფოს დედოფლის ოფიციალური ვიზიტის მომზადებაში და, როგორც ჰოლანდიიდან ჩასული სტუდენტი, გამოფენის ორგანიზებაში აქტიურად ვიყავი ჩართული. ამის გამო დედოფალ ბეატრიქს ორანიესა და პრინც ვილემ ალექსანდერისთვის გამართულ ოფიციალურ სადილზეც მიმიწვიეს. გრონინგენის უნივერსიტეტში სწავლის დროს ვმუშაობდი ჰოლანდიის ერთ-ერთ წამყვან ტურისტულ კომპანიაში მარკეტინგის მენეჯერად სკანდინავიის ქვეყნებსა და რუსეთში.

„თიკა-ტურს ჯორჯიას“ დაარსების იდეა როდის გაგიჩნდათ?

ჩემი სამშობლოსგან შორს ყოფნა ყოველთვის მაწუხებდა, მუდამ ვიქნები სულიერად დაკავშირებული საქართველოსთან. ამიტომაც ვიფიქრე, რომ ჩემი ქვეყნის პოპულარიზაციისთვის რამე უნდა გამეკეთებინდა და პირველი მაღალი კლასის ტურისტული კომპანია Tika Tours დავაფუძნე.

თბილისში Tika Tours-ის სათავო ოფისიც გაიხსნა. ჩვენი ორგანიზებით ეწვია საქართველოს 18 ჰოლანდიელი ჟურნალისტი, რომლებმაც ჩვენს ქვეყანას დიდი რეკლამა გაუწიეს, მომზადდა სარეკლამო ფილმიც საქართველოს ტურისტული პოტენციალის შესახებ. ამ ფაქტიდან მალევე, Tika Tours-ის ორგანიზებით და საქართველოს ეროვნული მუზეუმის ოფიციალური მხარდაჭერით, საქართველოს ეროვნული მუზეუმის ოქროს ფონდში დაცული განძი ასენის (ნიდერლანდები) მუზეუმში გამოიფინა, პირველი ევროპელების, ზეზვასა და მზიას თავის ქალები კი ლეიდენის (ნიდერლანდები) ბუნების მუზეუმში ერთი წლის განმავლობაში იყო გამოფენილი და უამრავმა ჰოლანდიელმა თუ ჩასულმა ტურისტმა ნახა.

თქვენი მეუღლე ამერიკელია, სად გაიცანით? ეს ერთი ნახვით შეყვარება იყო?

ჩემი მომავალი მეუღლე, წარმოშობით ამერიკელი რობერტ ვენკო, მოგზაურობის დროს გავიცანი. ერთმანეთს სიყვარულში მალევე გამოვუტყდით და ქართულ-ამერიკული პომპეზური ქორწილი ნიუ-იორკში გადავიხადეთ. შემდეგ ტრადიციული ქორწილი საქართველოშიც გქონდა: ჯვარი მცხეთაში, ჯვრის მონასტერში დავიწერეთ. ქორწინების შემდეგ სინგაპურში გადავსახლდით.

და უკვე სამი შვილიც გყავთ, ბავშვები სინგაპურში დაიბადნენ?

დიახ, სამივე. ჩემს მეუღლეს ძალიან შეუყვარდა საქართველო და, აქედან გამომდინარე, ჩვენს სამივე შვილს ქართული სახელები ჰქვია: გიორგი, ლევანი და თემური. ისინი უცხოეთში დაიბადნენ და იქ იზრდებიან, მაგრამ სამივეს თავი ქართველად მიაჩნია, იციან ქართული კულტურა, ქართულად მღერიან და ცეკვავენ. აგრეთვე, იციან ამერიკის, მამის სამშობლოს, კულტურა. ვცდილობ, ეს კულტურული ბალანსი იყოს ჩვენს ოჯახში.

სინგაპურში რამდენ ხანს ცხოვრობდით?

5 წელი და უკვე აზიის ქვეყნებიდან ჩამომყავდა ტურისტები საქართველოში. შემდეგ ჩიკაგოში გადავედით საცხოვრებლად და იქ ვცდილობდი საქართველოს, როგორც ტურისტულად მომხიბვლელი ქვეყნის, პოპულარიზაციას. 2011 წელს შვეიცარიაში გადავედით საცხოვრებლად.

ამჟამად, როგორც ვიცი, ამსტერდამში ცხოვრობთ. რას საქმიანობთ, ძირითადად?

დიახ, ამსტერდამში ჩემს ოჯახსა და მშობლებთან ერთად ვცხოვრობ. დავაარსე ქართული კულტურის ცენტრი, რომელიც საზღვარგარეთ მცხოვრები ქართველი ემიგრანტებისთვის მნიშვნელოვანი კულტურული შეხვედრების ტრადიციულ ადგილად იქცა. ცენტრში არის ქართული ენისა და ისტორიის წრე, ქართული ცეკვისა და სიმღერის ჯგუფები, ქართული ხალხური რეწვის, ქართული კულინარიის, ჭადრაკის კლასები და სხვა სასწავლო პროგრამები. ქართული კულტურის ცენტრისა და ჩემი ძალისხმევით, ჯვართამაღლების ეკლესიაც გაიხსნა, სადაც ჰოლანდიისა და ბელგიის ეპისკოპოსი სამღვდელოებასთან ერთად სისტემატურად ატარებს წირვა-ლოცვას.

კიდევ რას მოიცავს თქვენი საქმიანობა?

ემიგრანტებისთვის არაერთი კონცერტი გავმართეთ საქართველოდან მოწვეული მომღერლების მონაწილეობით; ვთანამშრომლობ ჰოლანდიის უნივერსიტეტებთან და ერთობლივად ვახორციელებთ სხვადასხვა სახის პროექტებს, საიდანაც განსაკუთრებით მინდა გამოვყო საზაფხულო სტუდენტური გაცვლითი პროგრამები ქართულ და ჰოლანდიურ უნივერსიტეტებს შორის. აგრეთვე, ჩვენი ცენტრის ორგანიზებით, ნიდერლანდებში უკვე გამოიფინა ნიჭიერი ქართველი ხელოვანების ნამუშევრები, ქართული ტრადიციული ტანსაცმელი და ხელნაკეთი ნივთები.

რა იქნება მომავალი ღონისძიება?

ამჟამად ვამზადებთ ტურისტულ სამიტს, რომელიც მიზნად ისახავს საქართველოს ცნობადობის გაზრდას დასავლეთ ევროპის ბაზარზე.

თიკა, მართლაც ძალიან დატვირთული ცხოვრებით ცხოვრობთ. წარმატებას გისურვებთ თქვენს საქმიანობაში.

დიდი მადლობა!

ესაუბრა ქეთი კვირკველია