ASSE Mercato – სულ რაღაც ერთ თვეში დავითაშვილი „სენტ-ეტიენის“ ყველაზე მნიშვნელოვან მოთამაშედ ჩამოყალიბდა
გამოცემა ASSE Mercato-მ წერილი გამოაქვეყნა ზურიკო დავითაშვილზე, რომელმაც საფრანგეთის ლიგა 1-ში სადებიუტო სეზონი წარმატებით დაიწყო.
„ზურიკო დავითაშვილი, რომელიც „სენტ-ეტიენში“ ზაფხულში 6 მილიონ ევროდ გადავიდა, მასზე დამყარებულ იმედებს ამართლებს. ჩემპიონატში ჩატარებული 9 მატჩის შემდეგ ქართველი ოლივიე დალ ოლიოს გუნდში ყველაზე შედეგიანი მოთამაშეა. ეს უკანასკნელი, შესაძლოა, მალე ლიგა 1-მა თვის გოლის პრიზით დააჯილდოვოს.
დავითაშვილს „სენტ-ეტიენთან“ კონტრაქტის გაფორმებამდე საფრანგეთის უმაღლეს ლიგაში არ უთამაშია. გასულ სეზონამდე ქართველი ნახევარმცველი „ბორდოში“ გამოდიოდა, სადაც 63 მატჩში 24 გოლში მონაწილეობდა.
ნაყოფიერი გასული სეზონის შემდეგ (8 გოლი, 8 საგოლე გადაცემა) „სენტ-ეტიენი“ დააინტერესა და „ბორდოს“ მოთამაშის შესაძენად 6 მილიონი ევრო გადაუხადა. ეს წარმატებული ინვესტიცია აღმოჩნდა. სულ 9 მატჩში ზურიკო დავითაშვილმა 5 გოლი გაიტანა და 2 საგოლე გადაცემა შეასრულა.
მისთვის ოქტომბერი პროდუქტიული იყო, ეფექტურად ითამაშა „მონაკოსა“ და „ბრესტთან“. „ოსერთან“ მატჩში (5 ოქტომბერი) ზურიკო დავითაშვილმა კარიერაში პირველი ჰეთთრიკი შეასრულა და „სენტ-ეტიენს“ მნიშვნელოვანი 3 ქულა მოუტანა, შემდეგ კი „ოსერთან“ 2 გოლი გაიტანა, თუმცა მისი გუნდისთვის ეს საკმარისი არ აღმოჩნდა.
სულ რაღაც ერთ თვეში ზურიკო დავითაშვილი „სენტ-ეტიენის“ ყველაზე მნიშვნელოვან მოთამაშედ ჩამოყალიბდა“, – წერს ფრანგული გამოცემა.
მერაბ მამულაშვილი
1tv.ge
p. s. დღეს ცნობილი გახდა, რომ ზურიკო დავითაშვილი ანალიტიკური პორტალის, whoscored-ის ვერსიით, საფრანგეთის ლიგა 1-ისა და ევროპის ტოპ-5 ლიგების ოქტომბრის თვის სიმბოლურ გუნდში მოხვდა.
Whoscored-მა დავითაშვილს, რომელმაც 5 ოქტომბერს „ოსერთან“ მატჩში 3 გოლი (ჰეთთრიკი) გაიტანა, იდეალური შეფასება – 10 ქულა დაუწერა, „ლანსთან“ მატჩში (სადაც არ გაუტანია) – 6,7, ხოლო „ანჟერთან“ – 7,66. ამ სამი შეფასების საშუალო არითმეტიკული 8,1 ქულაა. ამ მაჩვენებლით ქართველი ფეხბურთელი საფრანგეთის ლიგა 1-ისა და ევროპის ტოპ-5 ლიგების თვის ნაკრებში (ტაქტიკური სქემა 4-4-2) დასახელდა.
კომენტარები