7 სექტემბერი, 2025: მთვარის სრული დაბნელება – როგორ იმოქმედებს ის ზოდიაქოს ნიშნებზე
მთვარის სრული დაბნელება 7 სექტემბერს სრულიად იქნება ხილული თბილისში და, ზოგადად, საქართველოში - არ გამოტოვოთ იშვიათი სანახაობა
2025 წლის 7 სექტემბერს ცაზე იშვიათი სანახაობა გველის – მთვარის სრული დაბნელება.
ასტრონომიული მოვლენები ყოველთვის დიდ ინტერესს იწვევს, მით უფრო, რომ მათ ასტროლოგიური დატვირთვაც ახლავს. დაბნელება მოხდება თევზების ნიშანში, მზის საპირისპიროდ (ქალწულში) და სწორედ ამიტომ მის ენერგიას ძლიერი გარდამტეხი ძალა ექნება. ეს სანახაობრივი ასტრონომიული მოვლენა გახსნის დაბნელებების სეზონს, ამიტომ მისი გავლენა რამდენიმე კვირის განმავლობაში გაგრძელდება.
მთვარის დაბნელება ხდება მაშინ, როდესაც დედამიწა მთვარესა და მზეს შორის აღმოჩნდება და მთვარეს დაჩრდილავს. 7 სექტემბერს მთვარე არ გაქრება თვალთახედვიდან, არამედ იდუმალ მეწამულ ელფერს მიიღებს, რასაც ხალხში „სისხლიან მთვარეს“ უწოდებენ. ეს ხდება სინათლის გარდატეხის გამო, როდესაც მთვარე დედამიწის ჩრდილშია და მზის სხივები მასზე ჩვენი პლანეტის ატმოსფეროში გავლის შემდეგ ეცემა.
2025 წლის 7 სექტემბრის მთვარის სრული დაბნელების უნიკალურობა ის არის, რომ მისი დანახვის შესაძლებლობა, სრულად ან ნაწილობრივ მაინც, დედამიწის უდიდესი ნაწილის მაცხოვრებლებს ექნებათ – 7 მლრდ ადამიანზე მეტს. მთავარია, რომ ცა მოწმენდილი იყოს.
თუ ამინდი შესაფერისი იქნება, ამ ასტრონომიული ფენომენის დაკვირვებას შეუიარაღებელი თვალითაც შევძლებთ საქართველოშიც (დედამიწის სხვა ნაწილებთან ერთად) და ეს სანახაობა ნამდვილად არ უნდა გამოტოვოთ. მთვარის დაბნელების ყურება შეუიარაღებელი თვალისთვისაც არანაირ რისკს არ წარმოადგენს, მზის დაბნელებისგან განსხვავებით.
როდის დავინახავთ დაბნელებას საქართველოში
- დასაწყისი (პენუმბრალური ფაზა): 20:27
- სრული დაბნელება: იწყება 21:30
- პიკი: 22:11
- სრული დაბნელების დასასრული: 23:53
- მთლიანი პროცესი დასრულდება: 00:55 (8 სექტემბერი)
ასტროლოგიური მნიშვნელობა
ეზოთერიკაში მთვარის დაბნელება ასოცირდება ცვლილებებთან, ძველი ეტაპის დასრულებასა და ახალი ციკლის დაწყებასთან. ეს ის დროა, როდესაც ენერგია უფრო სწრაფად იწურება, ამიტომ საჭიროა საკუთარ თავზე ზრუნვა, დასვენება და გათავისუფლება იმ ყველაფრისგან, რაც აღარაფერში გვჭირდება და აღარ გვემსახურება.
რეკომენდებულია:
- ძველი ჩვევებისა და ზედმეტი ნივთებისგან გათავისუფლება;
- მედიტაცია და დეტოქსიკაცია;
- ცხოვრების მიზნებისა და გეგმების გადახედვა;
- ფიზიკურ და ემოციურ ჯანმრთელობაზე კონცენტრირება.
არასასურველია:
- მნიშვნელოვანი ფინანსური ტრანზაქციები ან სესხის აღება;
- ნაჩქარევი გადაწყვეტილებები;
- ახალი პროექტების დაწყება;
- ჩხუბი და კონფლიქტებში ჩართვა.
ვისზე იმოქმედებს ყველაზე ძლიერად?
დაბნელების გავლენა განსაკუთრებით საგრძნობია მათთვის, ვისი პირადი პლანეტები ან ნატალური რუკის მნიშვნელოვანი წერტილები ქალწულისა და თევზების ნიშნებშია. ასევე, მისი გავლენა უფრო შესამჩნევი იქნება ქალებსა და ბავშვებზე – შესაძლებელია შფოთვისა და ძილის დარღვევის მომატება.
რა გავლენას ახდენს 2025 წლის 7 სექტემბრის მთვარის დაბნელება ზოდიაქოს ნიშნების წარმომადგენლებზე:
ვერძი
დაბნელების დროს სხვადასხვაგვარი ეჭვები დაგტანჯავთ, გაიზრდება შფოთვა. შეიძლება იგრძნოთ, რომ მარტო დარჩით, საკუთარი თავის ამარა და განაწყენდეთ, მაგრამ მნიშვნელოვანია იმის გაგება, თუ რატომ გეძლევათ ეს ცხოვრებისეული გაკვეთილი. შესაძლოა პასუხი მარტივია და თქვენი ცხოვრების წესი, უბრალოდ, აღარ შეესაბამება იმ რეალობას, რომელშიც იმყოფებით. ამიტომ თავად შეცვალეთ ის, თორემ ბედი თავის ძალას მაინც გამოავლენს.
კურო
ამ დროს უნდა მოუსმინოთ თქვენს გრძნობებს – თქვენი სხეულის მოსმენის უნარი მნიშვნელოვანი უნარია. თუ შინაგან დაძაბულობას გრძნობთ, შესაძლოა ეს იმის ნიშანი იყოს, რომ არ უნდა გააკეთოთ ის, რაც თავში გიტრიალებთ. უმჯობესია იპოვოთ თანამოაზრე ადამიანების კომპანია, რომ საღამო მათთან ერთად გაატაროთ და შეადგინოთ თვითგანვითარების გეგმა უახლოესი მომავლისთვის.
ტყუპი
აქტიური მოქმედებებისა და საჯარო გამოსვლების დროა. მაშინაც კი, თუ შეცდომებს დაუშვებთ, თქვენ გარშემო მყოფები მათზე ყურადღებას არ გაამახვილებენ. თუმცა თქვენთვის მნიშვნელოვანია, რომ ყველა პროცესის კონტროლი შეინარჩუნოთ და მარტივი გზები არ ეძებოთ. ადამიანებთან ურთიერთობისას ყურადღება გაამახვილეთ მათზე, ვისთანაც კონტაქტის დამყარება ადვილია და ვისთანაც საერთო ინტერესები გაქვთ.
კირჩხიბი
დაბნელება შეგახსენებთ, რომ არავითარ შემთხვევაში არ უნდა გადადოთ დავალებები შემდეგისთვის – დაუყოვნებლივ გააკეთეთ მაქსიმუმი. ყველაფრის დასასრულებლად კი ნუ მოგერიდებათ კოლეგების ან მსგავსი აზროვნების ადამიანებისთვის დახმარების თხოვნა. მათგან ბევრ ახალ ინფორმაციას შეიტყობთ, რაც ნამდვილად ღირებული იქნება.
ლომი
ლომის ნატურა ასეთია – მას უყვარს კომფორტის ზონაში ყოფნა, მაგრამ ეს თქვენი დიდი მიზნების მიღწევამდე არ მიგიყვანთ. მთვარის დაბნელება შეგახსენებთ: თუ ერთსა და იმავე პოზიციაზე დარჩებით, ეს ცხოვრებაში სრულ იმედგაცრუებამდე მიგიყვანთ. კვირის განმავლობაში ყურადღება მიაქციეთ თემებს, რომლებსაც ადამიანები თქვენთან დიალოგში წამოჭრიან. თუ ემოციების გამოხატვისკენ გიბიძგებენ, ნუ აჰყვებით და სიმშვიდე შეინარჩუნეთ.
ქალწული
დაივიწყეთ წარსული – დროა ისწავლოთ ახლებურად ცხოვრება. შეგნებულად თქვით უარი თქვენთვის ჩვეულ ქცევებზე, თუნდაც თავიდან ეს რთული იყოს. და არ დაგავიწყდეთ დასვენება: ძალების მაღალი ხარისხით აღდგენა დაგეხმარებათ ჯანმრთელობის შენარჩუნებაში მრავალი წლის განმავლობაში. მთვარის ეს დაბნელება თქვენთვის ახალ პერსპექტივებს ხსნის – გამოიყენეთ ეს შანსი.
სასწორი
გირჩევთ, რომ მიმდინარე პერიოდში თავი შეიკავოთ სერიოზული გადაწყვეტილებების მიღებისგან – უმჯობესია ისინი ოქტომბრამდე გადადოთ. თუ სხვა სფეროებზე დამოუკიდებლად გადასვლა გიჭირთ, დაუკავშირდით სულიერ მენტორს. დროთა განმავლობაში შეიძლება მოგინდეთ სამუშაოს წინა მეთოდებზე დაბრუნება, მაგრამ მოძველებული მიდგომები ახალ პირობებში უსარგებლო და უშედეგო იქნება.
მორიელი
შესაძლოა რთული დავალებების შესრულების შემდეგ დასვენება გინდოდათ, მაშინ ბედს თქვენთვის სხვა გეგმები აქვს დასახული. გარემოებების ცვლილება იმდენად სწრაფი იქნება, რომ ადაპტაციისთვის ძალიან ცოტა დრო დაგრჩებათ, მაგრამ სწორედ ამ პერიოდში უნდა მიაქციოთ საკუთარ თავს რაც შეიძლება მეტი ყურადღება. დაბნელების დროს მოამზადეთ იმ ადგილების სია, სადაც სრულად დაისვენებთ და ძალებს მოიკრებთ.
მშვილდოსანი
მთვარის დაბნელება დაგეხმარებათ რეალობის ილუზიების გარეშე დანახვაში და მიმდინარე მოვლენების ნამდვილ სურათს გაჩვენებთ. მნიშვნელოვანია გააცნობიეროთ, რომ უნდა გაიზარდოთ და მეტი პასუხისმგებლობა აიღოთ. ეს თქვენს ცხოვრებისეულ გზას უფრო შეამსუბუქებს და ბედისწერის განსაცდელები ნაკლებად მძიმე იქნება. ახალი შესაძლებლობებისკენ გზის გასახსნელად წარსულის გადაუჭრელი საკითხების დასრულება მოგიწევთ.
თხის რქა
მიუხედავად იმისა, რომ თხის რქები, როგორც წესი, კონსერვატიულები არიან, ამ პერიოდში თავად ბედი გიბიძგებთ ცვლილებებისკენ. მოძველებული მიდგომებისა და მეთოდების უარყოფა სწორი გადაწყვეტილება იქნება – თქვენს მაგალითს შეუძლია სხვების შთაგონება. შეეცადეთ, გააფართოოთ თქვენი სოციალური წრე და უფრო ხშირად ეწვიოთ ახალ გარემოს, მაგრამ გახსოვდეთ: მნიშვნელოვანია ყურადღებით აკონტროლოთ თქვენი სიტყვები, რათა ისინი თქვენ წინააღმდეგ არ იქნას გამოყენებული.
მერწყული
ქაოსი და არასტაბილურობა თქვენთვის ნაცნობი სიტუაციებია, რომლებიც დაბნელების მთელ პერიოდს თან ახლავს. ამიტომ მოგიწევთ, სწრაფად მოძებნოთ პრობლემების გადაჭრის გზები და, ამავდროულად, პასუხისმგებელი იყოთ თითოეულ გადადგმულ ნაბიჯზე. ასევე, შესაძლებელია პარტნიორებთან ურთიერთობაში უცნაურობებიც გამოვლინდეს, მაგალითად, სერიოზული ჩხუბი მოგივიდეთ. გაჭიანურებული კონფლიქტების თავიდან ასაცილებლად თქვენი ბუნებრივი ქარიზმა უნდა გამოიყენოთ.
თევზები
მთვარის დაბნელება კონკურენციას გააძლიერებს ცხოვრების ყველა სფეროში. მნიშვნელოვანია თავდაჯერებულობისა და გაბედულების დემონსტრირება. ფოკუსირდით თქვენს ნამდვილ მიზნებზე და შეადგინეთ მკაფიო გეგმა მათ მისაღწევად. განსაკუთრებული ყურადღება მიაქციეთ თქვენს ფიზიკურ მდგომარეობას – მოუსმინეთ თქვენი სხეულის სიგნალებს, რათა დროულად აღიდგინოთ ძალები.
2025 წლის 7 სექტემბერს მთვარის დაბნელებას განსაკუთრებული გავლენა ექნება ზოდიაქოს სამ ნიშანზე:
ტყუპი
ტყუპებისთვის ეს დაბნელება დიდი შინაგანი გადაფასების მომენტი იქნება.
მომავალი და ბედისწერა: იქნება სურვილი, უარი თქვათ ძველი ვალდებულებებზე ან ურთიერთობებზე, რომლებიც აღარ უზრუნველყოფენ ზრდას. თავს დააღწევთ სიტუაციიდან, რომელსაც დიდი ხანია აღარ მოაქვს სიხარული.
კარიერა და ფული: იქნება მოულოდნელი შემოთავაზება სამსახურის თაობაზე ან გამოწვევა, რომლის გამოყენებაც ღირს. თქვენი მოქნილობა და ალღო დაგეხმარებათ, მოძებნოთ სრულიად ახალი შემოსავლის წყარო.
სიყვარული: პირად ცხოვრებაში შესაძლებელია გულწრფელი საუბრები, რაც ურთიერთობაში ახალ ეტაპამდე ან, საერთოდაც, მის დასრულებამდე მიგიყვანთ. ეს მოგცემთ შესვენების შესაძლებლობას და შანსს, შეხვდეთ ადამიანს, რომელიც თქვენს გულთან უფრო ახლოსაა.
რჩევა: ნუ შეუშინდებით ცვლილებებს, ისინი იქ მიგიყვანენ, სადაც ნამდვილად არის თქვენი ადგილი.
ქალწული
დაბნელება ქალწულებს საშუალებას მისცემს, ჩრდილიდან გამოვიდნენ და ხმამაღალი და თამამი განცხადება გააკეთონ საკუთარი თავის შესახებ.
მომავალი და ბედისწერა: გექნებათ განცდა, რომ ცხოვრების ახალი ციკლი იწყება. თითქოს ძველ კანს იცვლით და საკუთარ თავს განაახლებთ.
კარიერა და ფინანსები: ეს კარიერული გარღვევის დროა. თქვენი ძალისხმევა საბოლოოდ შესამჩნევი იქნება, შესაძლებელია ზრდა ახალი პროექტების დაწყების ან დაწინაურების გზით. თქვენი ფინანსური მდგომარეობა თანდათან გაუმჯობესდება.
პირადი ცხოვრება: მნიშვნელოვანია, უფრო მეტად ღია და გულწრფელი იყოთ. თქვენმა კრიტიკულობამ შეიძლება ჩხუბი გამოიწვიოს, თუ ემოციებს არ გააკონტროლებთ. დაბნელება გამოკვეთს თქვენი პარტნიორის ნამდვილ გრძნობებს და გაურკვევლობებს წერტილი დაესმება.
რჩევა: გათავისუფლდით წვრილმანებისგან, რომლებიც თქვენს ენერგიას „ხაპავენ“. ახლა მნიშვნელოვანია ცხოვრების ფართომასშტაბიანი ხედვა.
თევზები
7 სექტემბერს თევზებისთვის ცხოვრების რადიკალურად ახალი თავი გაიხსნება – განსაკუთრებით ურთიერთობებისა და სულიერი ზრდის თვალსაზრისით.
მომავალი და ბედისწერა: დაბნელება ნათლად გაჩვენებთ, სად ზღუდავდით საკუთარ თავს. მოულოდნელი შემობრუნებები ისეთ გზაზე გაგიყვანთ, რომელზეც არასდროს გიფიქრიათ.
კარიერა და ფული: შთაგონებული იქნებით, გააკეთოთ ის, რაც დიდი ხნის წინ უნდა გაგეკეთებინათ, მაგრამ გაურკვეველი დროით გადადეთ. შესაძლებელია შემოქმედებით ან სულიერ პრაქტიკებთან დაკავშირებული თანხების მოულოდნელი შემოდინება.
სიყვარული: თევზები ძლიერ მიზიდულობას იგრძნობენ იმ ადამიანის მიმართ, რომელიც შეცვლის მათ წარმოდგენას პარტნიორობაზე. მარტოხელებს ექნებათ შანსი, შეხვდნენ თავიანთი ცხოვრების მთავარ სიყვარულს.
რჩევა: მოუსმინეთ თქვენს ინტუიციას და ენდეთ მინიშნებებს. ისინი უფრო სწორი და ზუსტი იქნება, ვიდრე ნებისმიერი რჩევა.
***
2025 წლის 7 სექტემბერს მთვარის დაბნელება ერთდროულად გამოცდაც იქნება და საჩუქარიც. ტყუპს, ქალწულს და თევზებს ექნებათ შანსი, ახლიდან დაწერონ თავიანთი ცხოვრების სცენარი. ეს ცვლილებები შეიძლება მოულოდნელი მოგეჩვენოთ, მაგრამ ისინი იმ სიმაღლეებამდე მიგიყვანთ, რომლებსაც ნამდვილად იმსახურებთ.
თამთა გურული
კომენტარები