ისრაელში ქართული ბანდის წევრები დააკავეს, რომლებიც ავტობუსებში მოხუცებს ძარცვავდნენ – რას წერს მათზე მედია

ისრაელში ქართული ბანდა დააკავეს, რომლებიც ავტობუსებში მოხუცებს ძარცვავდნენ.

ისრაელის პოლიციამ ოპერატიულ ინფორმაციაზე დაყრდნობით, ცხელ კვალზე, ქართული კრიმინალური დაჯგუფების წევრები დააკავა, რომლებიც ავტობუსებში ხანდაზმულ ადამიანებს სისტემატურად ძარცვავდნენ.

პოლიციის ცენტრალურმა დეპარტამენტმა უკვე დაასრულა ფართომასშტაბიანი გამოძიება ორგანიზებული დანაშაულებრივი ჯგუფის წინააღმდეგ, რომელიც სისტემატურად ძარცვავდა ხანდაზმულ მგზავრებს საზოგადოებრივ ტრანსპორტში. დაჯუფების წევრები საქართველოს მოქალაქეები არიან.

გამოძიების თანახმად, დაჯგუფების წევრები პენსიონერებს ავტობუსის გაჩერებაზე „ირჩევდნენ“, შემდეგ მათთან ერთად მგზავრობდნენ. მოგვიანებით კი ავტობუსშივე ძარცვავდნენ. მათ ოსტატურად ამოჰქონდათ საფულეები, ფული და ძვირფასი ნივთები ხანდაზმულთა ჯიბეებიდან და ჩანთებიდან.

კრიმინალები ისრაელის სხვადასხვა რეგიონში მოქმედებდნენ და მათი სქემების მსხვერპლი 100-ზე მეტი ისრაელელი მამაკაცი და ქალი გახდა. დაზარალებულთა უმრავლესობა 70-იდან 90 წლამდე ასაკისაა. პოლიციამ გააერთიანა მსხვერპლთა საჩივრები შფელის, გუშ დანის, აშდოდის და ჰაიფის რაიონებში.

ოპერატიული ინფორმაციით გამომძიებლებმა შეძლეს ხუთი ეჭვმიტანილის იდენტიფიცირება – ყველა მათგანი დაახლოებით 30 წლისაა. საქმის მასალები ბრალდების მოსამზადებლად უკვე პროკურატურას გადაეცა.

„გამოძიების დასრულება შესაძლებელი გახდა ოპერატიული დანაყოფების კოორდინირებული მუშაობისა და ინციდენტების შესახებ მოქალაქეთა შეტყობინებების წყალობით“, – ნათქვამია ცენტრალური პოლიციის დეპარტამენტის განცხადებაში.

primetime.ge