13 ივლისს ნიუ-ჯერსიში (აშშ) გამართულ FIFA-ს საკლუბო მსოფლიო თასის ფინალში ლონდონის „ჩელსიმ“ შეუცდომლად ითამაშა, „პარი სენ-ჟერმენი“ მშრალი ანგარიშით 3:0 დაამარცხა და ტურნირის გამარჯვებული გახდა. მატჩს აშშ-ის პრეზიდენტი დონალდ ტრამპი და პირველი ლედი მელანია ტრამპიც დაესწრნენ.
მატჩის სცენარი და ვარსკვლავები
შეთანხმებული გუნდური თამაშისა და სწრაფი შეტევების წყალობით, „ჩელსიმ“ ჯერ კიდევ პირველ ტაიმში „წაშალა“ ყველა კითხვის ნიშანი. ბრაზილიელმა ფეხბურთელმა კოულ პალმერმა, რომელიც „ჩელსის“ საკლუბო ჩემპიონატის მიმდინარეობისას შეუერთდა, მე-22 და 30-ე წუთებზე ორი ულამაზესი გოლი გაიტანა, ხოლო 43-ე წუთზე ჟოაო პედროს მესამე გოლი სწორედ პალმერის ბრწყინვალე გადაცემის შემდეგ გავიდა დონარუმას კარში. საბოლოოდ, პირველი ნახევრის შემდეგ ანგარიში უკვე 3:0 იყო ლონდონელთა სასარგებლოდ და შეხვედრის ბოლომდე აღარ შეცვლილა.
ხვიჩა კვარაცხელია – ჩრდილში დარჩენილი ვარსკვლავი
„პსჟ-ის“ ერთ-ერთი ყველაზე ძვირადღირებული მოთამაშე ხვიჩა კვარაცხელია შეხვედრაში თითქმის შეუმჩნეველი დარჩა.
ფრანგული სპორტული პრესის შეფასებით, ქართველი ვარსკვლავი „დეზორგანიზებული და ემოციურად გადაღლილი გუნდის მძევლად“ მოგვევლინა. პარიზელთა თამაშს აშკარად აკლდა სტრუქტურა და პოზიციური სინქრონულობა, განსაკუთრებით სუსტი იყო ფლანგური და ნახევარდაცვითი მოქმედებები, რაც მნიშვნელოვანად ზღუდავდა კვარაცხელიას სივრცეებსა და მოქმედების თავისუფლებას. შედეგად, მას პრაქტიკულად არ მიეცა საშუალება, თამაშზე ზემოქმედება მოეხდინა.
კვარაცხელიას დარტყმით მეორე ტაიმში პირველი სახიფათო მომენტი შეიქმნა – „ჩელსის“ მეკარე რობერტ სანჩესმა ბურთი ვერ შეიმაგრა, თუმცა დამატებაზე პარიზელთა თავდამსხმელებმა მცველებს ვერ დაასწრეს.
58-ე წუთზე ლუის ენრიკემ ხვიჩა კვარაცხელია მოედნიდან გაიყვანა, მის ნაცვლად თამაშში ბრედლი ბარკოლა ჩაერთო. ქართველმა ფეხბურთელმა ტურნირი ერთი გოლითა და ორი საგოლე გადაცემით დაასრულა.
დაძაბულობა ფინალში
მატჩის ბოლოს, 85-ე წუთზე პარიზელთა ნახევარმცველმა ჟოან ნევესმა წითელი ბარათი მიიღო, როცა უხეშად გაუსწორდა მეტოქეს – მან მარკ კუკურელიას თმაზე მოქაჩა. დაძაბულობა შეიქმნა თამაშის შემდეგ, როდესაც, გავრცელებული ინფორმაციით, ლუის ენრიკემ სიტყვიერი შეურაცხყოფა მიაყენა „ჩელსის“ ფეხბურთელს ჟოაო პედროს, რაც შესაძლოა დისკვალიფიკაციით დასრულდეს.
ამ გამარჯვებით „ჩელსიმ“ მეორედ მოიპოვა მსოფლიო საკლუბო ჩემპიონის ტიტული (პირველად – 2021 წელს), რაც მნიშვნელოვანი წარმატებაა ახლად დანიშნული მწვრთნელისთვის, ენცო მარასკასთვის.
კოულ პალმერი „ფიფამ“ მსოფლიო საკლუბო ჩემპიონატის საუკეთესო ფეხბურთელად დაასახელა და, კრიტიკოსების შეფასებით, „ჩელსის“ ბრაზილიელმა ნახევარმცველმა ინგლისური ფეხბურთის ლიდერობაზე სერიოზული „განაცხადი გააკეთა“.
ნუცა ყაველაშვილი
კომენტარები