იტალიაში მეტეოროლოგიურმა პირობებმა ორი ადამიანი იმსხვერპლა – იტალიასა და საბერძნეთში ტემპერატურა კიდევ მოიმატებს

დასავლეთ ევროპაში სიცხის ტალღა პიკს უახლოეს დღეებში მიაღწევს. Bloomberg-ის ინფორმაციით, ასეთმა მაღალმა ტემპერატურამ შესაძლოა ელექტროქსელების მუშაობაში საგანგებო სიტუაციები გამოიწვიოს და ჯანმრთელობას  საფრთხე შეუქმნას.  

ევროპაში უამინდობას უკვე ორი ადამიანი შეეწირა. გავრცელებული ინფორმაციით, დაღუპულები იტალიის მოქალაქეები არიან. ერთ-ერთი მათგანი, 47 წლის მამაკაცი ძლიერი სიცხისგან მშენებლობაზე გახდა შეუძლოდ, მეორე დაღუპული კი, 70 წლის მამაკაცი, ტურინში წყალდიდობას ემსხვერპლა.

პორტუგალიასა და ესპანეთში კი ივნისის თვისთვის რეკორდულად მაღალი 46.6 ტემპერატურა ფიქსირდება.

სინოპტიკოსები მომდევნო დღეებში ტემპერატურის მცირედით კლებას პროგნოზირებენ, თუმცა სიცხე კიდევ უფრო მოიმატებს ბალკანეთში, იტალიასა და საბერძნეთში.

სიცხის ძლიერ ტალღებს ელოდებიან საფრანგეთში. ქვეყნის 16 დეპარტამენტში, მათ შორის, დედაქალაქში განგაშის წითელი დონეა გამოცხადებული. დროებით დაიხურება ეიფელის კოშკი.