მასკი ტრამპის უფროს მრჩეველს გონებაჩლუნგს უწოდებს – ტრამპი ტარიფებზე უკან იხევს?

თეთრ სახლში მწვავდება კონფლიქტი ახალი საბაჟო ტარიფების გამო. ადრეც გამოჩნდა, რომ მასკი უკმაყოფილოა აშშ-ის პრეზიდენტის სატარიფო პოლიტიკით, რადგან მიაჩნია, რომ ის ბიზნესს კარგს არაფერს უქადის. მულტიმილიარდერმა ცოტა ხნის წინ განაცხადა, რომ როგორც თავად აშშ-ში, ისე ევროპაში უნდა შეიქმნას ნულოვანი ტარიფების სისტემა და თავისუფალი ვაჭრობის ზონა.

ახლა კი კომპანია Tesla-ს ხელმძღვანელმა საქვეყნოდ მიაყენა შეურაცხყოფა ტრამპის უფროს მრჩეველს ვაჭრობის საკითხებში პიტერ ნავაროს მას შემდეგ, რაც ამ უკანასკნელმა მასკი გააკრიტიკა. ნავაროს, როგორც ჩანს, გულზე მოხვდა მისი კრიტიკული გამონათქვამები იმპორტულ პროდუქციაზე ტარიფებს დაწესებასთან დაკავშირებით. მან ტელეარხ CNBC-სთან ინტერვიუში განაცხადა, რომ Tesla არასაკმარისად ამერიკულია:

„სინამდვილეში ის [მასკი] მწარმოებელი კი არა, ამწყობია. თუ შევხედავთ მის ქარხანას ტეხასში, ჩანს, რომ: ძრავების დიდი ნაწილი – ელექტრომობილებში ეს არის აკუმულატორები – იაპონიიდან და ჩინეთიდან შემოდის, ელექტრონიკა – ტაივანიდან. ხოლო ჩვენ რაც გვინდა – რითაც ილონისგან განვსხვავდებით – ეს არის: საბურავები აკრონიდან, გადაცემათა კოლოფები – ინდიანაპოლისიდან, ძრავები – ფლინტიდან და საგინოდან. და რომ ავტომობილები იწარმოებოდეს აქ, აშშ-ში“.

ნავაროს, როგორც ჩანს, ასე უნდოდა აეხსნა, რატომ არის მასკი ტრამპის ახალი საბაჟო ტარიფების წინააღმდეგი. Tesla-ს ხელმძღვანელი, რა თქმა უნდა, ვალში არ დარჩა და თავის სოციალურ პლატფორმა X-ზე „საკადრისი“ პასუხი გასცა:

„ნავარო – ნამდვილი გონებაჩლუნგია. რასაც იგი ამბობს – სიცრუეა. Tesla აწარმოებს ყველაზე უფრო ამერიკულ ავტომობილებს. ნავარო უფრო სულელია, ვიდრე აგურებით სავსე ტომარა“.

ამასთან, მილიარდერმა ოპონენტის სახელი მისთვის ჩვეულ სტილში დაამახინჯა – პიტერ ნავაროს  უწოდა „პიტერ რეტარდო“ (ინგლისურად retarded გონებრივად ჩამორჩენილს ნიშნავს).

ეს დაპირისპირება ნათლად მიუთითებს მზარდ კონფლიქტზე წარმოების ინტერესებსა და ტრამპის სავაჭრო პოლიტიკას შორის. მსხვილი ტექნოლოგიური კომპანიები, როგორიცაა Tesla, მიწოდების გლობალურ ჯაჭვში არიან ჩართულნი და ახალ ტარიფებში საფრთხეს ხედავენ საკუთარი წარმოებისთვის.

როგორც ცნობილია, ორიოდე დღის წინ ტრამპმა 90 დღით შეაჩერა ტარიფების დაწესება რიგი სახელმწიფოებისთვის, თავის მხრივ, ევროკავშირმაც ანალოგიურ ზომას მიმართა და 90 დღით შეაჩერა საპასუხო ტარიფების დაწესება, თუმცა განმარტა, რომ თუ შეთანხმება ვერ მოხერხდება, ევროკავშირი უკან არ დაიხევს.

NBC news-ის ინფორმაციით, რომელსაც ტელეარხი ტრამპის ადმინისტრაციის ანონიმურ წყაროზე დაყრდნობით ავრცელებს, აშშ-ის პრეზიდენტი ტარიფების „დაპაუზებაში“ ორმა მინისტრმა ერთობლივად დაარწმუნა – ფინანსთა მინისტრმა სკოტ ბესენტმა და ვაჭრობის მინისტრმა ჰოვარდ ლიუტნიკმა. როგორც ტელეარხი იუწყება, ტრამპის უახლოესი  გარემოცვა შეშფოთდა ფინანსური ბაზრების გამო, ზოგიერთი მათგანი კი თითქმის პანიკამ მოიცვა.

9 აპრილს ტრამპმა გამოაქვეყნა პოსტი სოციალურ ქსელში Truth Social, რომელშიც განაცხადა, რომ 90 დღით აჩერებს მის მიერ დაწესებული უპრეცედენტო ტარიფების ამოქმედებას მსოფლიოს უმეტესი ქვეყნის მიმართ, თუმცა არ დაუკონკრეტებია, რომელ ქვეყნებზე გავრცელდება ეს გადაწყვეტილება.

პარასკევს ღამით კი, მას შემდეგ, რაც ჩინური საქონლისთვის დაწესებული საბაჟო ტარიფი 145%-მდე გაზარდა (არსებული 20%-იდან), რადგან ჩინეთმა, მოლაპარაკებების დაწყებაზე თხოვნის ნაცვლად სარკისებურად აამოქმედა ტარიფები ჩინეთისთვის განკუთვნილ ამერიკულ საქონელზე, აშშ-ის საბაჟო და სასაზღვრო სამსახურმა ახალი განკარგულება გამოსცა, რომლის თანახმადაც, აშშ-ის პრეზიდენტის მიერ გამოცხადებული ახალი ტარიფები არ გავრცელდება სმარტფონებზე, კომპიუტერებსა და სხვა ელექტრონულ მოწყობილობებზე. ტარიფები არ გავრცელდება, მათ შორის, ნახევარგამტარებზე, მზის ბატარეებზე, ბრტყელ სატელევიზიო ეკრანებზე, ფლეშ ბარათებზე და მეხსიერების ბარათებზე.