ავსტრია გახდება ევროკავშირის წევრი პირველი ქვეყანა, რომელიც მიგრანტთა ოჯახის წევრების გაერთიანებას შეაჩერებს

ავსტრიის სამპარტიულმა სამთავრობო კოალიციამ გამოაცხადა, რომ ქვეყანაში მყოფ თავშესაფრის მაძიებელთა ნათესავებს არ ექნებათ უფლება, შეუერთდნენ თავიანთ ახლობლებს, რომლებიც უკვე ცხოვრობენ ავსტრიის რესპუბლიკაში. ახალი მთავრობის მტკიცებით, სოციალური სისტემა გადატვირთულია და ლტოლვილთა შემოდინებას ვერ უმკლავდება.

ავსტრიის კოალიციურმა მთავრობამ მიიღო გადაწყვეტილება, დაუყოვნებლივ შეაჩეროს ლტოლვილთა ოჯახების გაერთიანების პროცედურა. უფლებადამცველების თქმით, ეს არის თავშესაფრის მიცემის ევროპული კანონის დარღვევა. თავის მხრივ, ავსტრიის კანცლერმა კრისტიან შტოკერმა, რომელიც ამ პოსტს მიმდინარე წლის 3 მარტიდან იკავებს, ეს ნაბიჯი იმით გაამართლა, რომ მიგრანტების მოზღვავების გამო სოციალური სერვისები უკვე სრული დატვირთვით მუშაობენ. მისი თქმით, ეს დროებითი ღონისძიებაა.

„შეჩერება – როგორც ვთქვი, ეს დროებითი ღონისძიებაა – მიზნად ისახავს, უზრუნველვყოთ მათი საზოგადოებაში და განათლების სისტემაში ინტეგრაცია, ვინც ბოლო წლებში  შემოვიდა ჩვენთან, აგრეთვე, გარანტირებულად უნდა გავუმკლავდეთ ამ შემოდინებას – როგორც მათი, ვინც ჩვენთან მოდის, ისე მათი, ვინც უკვე აქ არის“, – განაცხადა კრისტიან შტოკერმა, ავსტრიის კანცლერმა და დასძინა, რომ „ავსტრიის შესაძლებლობები შეზღუდულია“.

ახალი ღონისძიება ნიშნავს, რომ ე. წ. დაცულის სტატუსის მქონე ლტოლვილებს (ადამიანები, რომელთა დეპორტაცია შეუძლებელია) არ მიეცემათ უფლება, ავსტრიაში ჩაიყვანონ თავიანთ ოჯახის წევრები, რომლებიც ჯერ კიდევ მათ მშობლიურ ქვეყნებში ცხოვრობენ. ავსტრიის ახლად შექმნილმა მთავრობამ განაცხადა, რომ მიგრაციის შეკავება მისი პრიორიტეტია და პირობა დადო, რომ ახალ მკაცრ წესებს შემოიღებს თავშესაფრის მინიჭების შესახებ.

ავსტრიის ინტეგრაციის მინისტრის, კლაუდია პლაკოლმის განმარტებით, რომელიც მან მინისტრთა კაბინეტის სხდომაზე გააკეთა აღნიშნული საკითხის განხილვისას, შესაბამისი განკარგულება „მაისამდე გამოქვეყნება და რამდენიმე კვირაში ეს გადაწყვეტილება რეალობად იქცევა“. შეჩერება თავდაპირველად ექვსი თვის განმავლობაში იმოქმედებს, თუმცა შესაძლოა 2027 წლის მაისამდე გაგრძელდეს.

ოფიციალური მონაცემებით, ოჯახების გაერთიანების პროცედურის ფარგლებში გასულ წელს ავსტრიაში 7762 ადამიანი ჩავიდა. თავშესაფრის მაძიებელთა უმეტესობა ქვეყანაში სირიიდან და ავღანეთიდან ჩავიდა.

ამავდროულად, ავსტრიის შინაგან საქმეთა მინისტრმა გერჰარდ კარნერმა განაცხადა, რომ მიმდინარე წლის თებერვალში მხოლოდ 60 განცხადება მიიღეს ოჯახის გაერთიანებაზე – ალბათ იმიტომ, რომ სირიელთა განაცხადების უმეტესობა არ განხილულა სირიაში ხელისუფლების ცვლილების გამო.

ოჯახის გაერთიანების შეჩერების ზომა ევროკავშირში უპრეცედენტოა და ავსტრიაში მისი მიღება ხდება ევროკავშირის წევრ სახელმწიფოებში მიგრაციული პოლიტიკის გამკაცრებისა და ულტრამემარჯვენე ძალების აღზევების ფონზე.

ცნობისათვის, სტატისტიკური მონაცემების თანახმად, ავსტრიაში, რომლის მოსახლეობა  9.2 მილიონამდეა,  2023 წელს მიგრანტთა 9300 ოჯახი ცხოვრობდა, ხოლო 2024 წელს – 7800 ოჯახი, ანუ 1500-ით ნაკლები.

ნანა ძნელაძე