აშშ-ის მხრიდან ტარიფების შემოღება იტალიურ წარმოებას დიდ დარტყმას მიაყენებს – როგორ ცდილობს ჯორჯა მელონი „ტარიფების ომის“ თავიდან აცილებას

აშშ-ის პრეზიდენტმა დონალდ ტრამპმა ევროკავშირს – 20%-იანი და დიდ ბრიტანეთს კი 10%-იანი ტარიფები დაუწესა. იტალიის პრემიერ-მინისტრი ჯორჯა მელონი შეშფოთებულია აშშ-ის პრეზიდენტ დონალდ ტრამპის ქმედებებით იმპორტის ტარიფების შემოღებასთან დაკავშირებით და ამ გადაწყვეტილებას არასწორს უწოდებს.

ჯორჯა მელონის ამბობს, რომ აუცილებელია ყველა შესაძლებლობის გამოყენება, რათა სავაჭრო ომი თავიდან იყოს აცილებული.

იგი გეგმავს, უახლოეს მომავალში შეერთებულ შტატებს ეწვიოს ეკონომიკური ზომების ნაწილობრივი შემსუბუქების შესახებ მოლაპარაკების მიზნით. ინფორმაციას Bloomberg-ი ოფიციალურ პირებზე დაყრდნობით ავრცელებს.

Bloomberg-ი იხსენებს, რომ მელონი ერთადერთი ევროპელი ლიდერი იყო, რომელიც იანვარში ამერიკის პრეზიდენტის ინაუგურაციას დაესწრო. ტრამპმა მას, აგრეთვე, ფლორიდაში მარ-ა-ლაგოს რეზიდენციაში უმასპინძლა. გარდა ამისა, იტალიის პრემიერ-მინისტრმა ამერიკელ ბიზნესმენ ილონ მასკთან მეგობრობაზეც ისაუბრა. ამავდროულად, მარტში იტალიის მთავრობამ შეაჩერა მოლაპარაკებები თავდაცვისა და დიპლომატიური საჭიროებისთვის მასკის SpaceX კომპანიასთან Starlink-ის თანამგზავრული საკომუნიკაციო სერვისების მიწოდებაზე.

ტრამპის ევროპელი ფავორიტის, ჯორჯა მელონის ამერიკული ვოიაჟის ზუსტი თარიღი ჯერ უცნობია.

სხვადასხვა ქვეყნისთვის აშშ-ის მიერ დაწესებული ტარიფები ასეთია: ჩინეთს 34%-იანი ტარიფი დაუწესდა, ინდოეთს – 26%-იანი, იაპონიას – 24%-იანი, ვიეტნამს – 46%-იანი, ტაივანს – 32%-იანი, სამხრეთ კორეას – 25%-იანი, კამბოჯას – 49%-იანი, ტაილანდს – 36%-იანი, შრი-ლანკას – 44%-იანი და ა. შ. ასევე, ტრამპმა 25%-იანი ტარიფი დააწესა უცხოური წარმოების ყველა ავტომობილზე. ინფორმაციას „სქაი ნიუსი“ ავრცელებს.

როგორც მედია წერს, დოკუმენტი შვიდი გვერდისგან შედგება და ბევრ ქვეყანას მოიცავს, თუმცა უცნობია, აპირებს თუ არა ტრამპი რუსეთისთვის ტარიფების დაწესებას.