დემოკრატების პირველი გამარჯვება ტრამპის გაპრეზიდენტების შემდეგ – რესპუბლიკელები ვისკონსინის უზენაეს სასამართლოში უმცირესობაში აღმოჩნდნენ

ვისკონსინის შტატის უზენაეს სასამართლოში აირჩიეს მოსამართლე სიუზან კროუფორდი, რომელსაც დემოკრატები უჭერენ მხარს. ეს პირველი მარცხია ამერიკის ახალი ადმინისტრაციისთვის, რომელსაც პრეზიდენტი დონალდ ტრამპი ხელმძღვანელობს.

პირველ აპრილს შეერთებულ შტატებში პირველი არჩევნები ჩატარდა დონალდ ტრამპის თეთრ სახლში დაბრუნების შემდეგ: ვისკონსინმა შტატის უზენაესი სასამართლოს წევრი აირჩია, ხოლო ფლორიდამ –  წარმომადგენელთა პალატის წევრი.

თუ ფლორიდაში გამართულ აშშ-ის კონგრესის შუალედურ არჩევნებში რესპუბლიკელმა რენდი ფაინმა გაიმარჯვა, რომელმაც დემოკრატი ჯოშ ვეილი დაამარცხა, ვისკონსინში გამარჯვება დემოკრატიული ძალების მიერ მხარდაჭერილ კანდიდატს ერგო.

CBS News-ის ცნობით, ბიულეტენების უმრავლესობის დათვლის შემდეგ ხმების დაახლოებით 54%-ს აგროვებს 60 წლის სიუზან კროუფორდი, რომელსაც აგიტაციას უწევდნენ აშშ-ის ყოფილი პრეზიდენტი ბარაკ ობამა და ფილანთროპი ჯორჯ სოროსი. რესპუბლიკელ ბრედ შიმელს, რომელსაც მხარს უჭერდა მილიარდერი ილონ მასკი, ამომრჩეველთა ხმების დაახლოებით 45% აქვს.

ვისკონსინის უზენაესი სასამართლოს არჩევნები ყველაზე ძვირად ღირებული გახდა შტატის ისტორიაში – ორივე კანდიდატის კამპანიაზე 100 მილიონ დოლარზე მეტი დაიხარჯა. Financial Times-ის დათვლით, პირადად ილონ მასკმა თავისი ფავორიტის მხარდასაჭერად 20 მილიონზე მეტი დახარჯა.

„ვისკონსინი ადგა და ხმამაღლა თქვა, რომ მართლმსაჯულება შეუფასებელია. ჩვენი სასამართლოები არ იყიდება!“ – თქვა სამშაბათს, პირველ აპრილს სიუზან კროუფორდმა მხარდამჭერებისადმი მიმართვისას.

სიუზან კროუფორდი, დეინის ოლქის მოსამართლე, ადრე Planned Parenthood-ის კერძო ადვოკატი იყო და მხარს უჭერდა აბორტის უფლებებს თავისი წინასაარჩევნო კამპანიის დროს.

მისი გამარჯვება ლიბერალებს უნარჩუნებს კონტროლს ვისკონსინის უზენაეს სასამართლოში 4-3 შეფარდებით. უფრო მეტიც, მოსალოდნელია, რომ ამ არჩევნებში დემოკრატების გამარჯვებას შორს მიმავალი შედეგები მოჰყვება, რაც პოტენციურად იმოქმედებს აშშ-ის კონგრესში ძალთა ბალანსზეც კი.

ვისკონსინი რთული შტატია თეთრი სახლის ახალი ადმინისტრაციისთვის. ბოლო არჩევნებში აქ დონალდ ტრამპმა 1%-ზე ნაკლები უპირატესობით გაიმარჯვა  და გუშინდელი არჩევნები ამ შტატში იყო ტრამპის მიმართ ამომრჩეველთა განწყობების პირველი რეალური შემოწმება ხელისუფლებაში მისი ყოფნის რამდენიმე თვისა და მის მიერ მიღებული რამდენიმე არაერთმნიშვნელოვანი გადაწყვეტილებების შემდეგ.

მილიარდერმა ილონ მასკმა, რომელიც შიმელის საარჩევნო კამპანიის აშკარა ფანდრაიზერი იყო, განაცხადა, რომ ამ არჩევნების შედეგზე შეიძლება დამოკიდებული იყოს არა მხოლოდ შეერთებული შტატების, არამედ „მთელი ცივილიზაციის“ მომავალი.

მოსალოდნელია, რომ ვისკონსინი მნიშვნელოვან როლს შეასრულებს კონგრესის ოლქების განაწილებაში 2026 წლის შუალედური არჩევნების წინ და 2028 წელს მომდევნო საპრეზიდენტო არჩევნების წინ. Tesla-სა და SpaceX-ის ხელმძღვანელი ამტკიცებს, რომ ვისკონსინის სასამართლომ შესაძლოა ისე შეცვალოს საარჩევნო ოლქების საზღვრები მომავალში, რესპუბლიკელებმა ვერ შეძლონ თავიანთი კანდიდატების  გამარჯვება. დემოკრატები ამტკიცებენ, რომ რესპუბლიკელებმა უკვე გადააკეთეს ვისკონსინის ოლქები ისე, რომ ბალანსი თავიანთ სასარგებლოდ გადაეხარათ.