ფინეთი მსოფლიოში ყველაზე ბედნიერ ქვეყნად რჩება, ესპანეთი 38-ე, ხოლო საქართველო 91-ე ადგილზეა
ფინეთი მსოფლიოში ყველაზე ბედნიერი ქვეყანაა. ამას ადასტურებს ხუთშაბათს, 20 მარტს „World Happiness Report 2025“-ის მიერ გამოქვეყნებული რეიტინგების სია, რომელშიც ფინელები უკვე რვა წელია ლიდერობენ. ეს მას შემდეგ მოხდა, რაც 2016 წელს მათ ნორვეგიელებს გადაუსწრეს. ესპანეთი კი ორი ადგილით ჩამოქვეითდა და 36-დან 38-ე ადგილზე გადაინაცვლა. მას გაუსწრო ისეთმა ქვეყნებმა, როგორიცაა: სალვადორი (37), ქუვეითი (30) და ისრაელი (8).
მსოფლიოს ყველაზე ბედნიერი ქვეყნების ათეულში პირველად მოხვდა კოსტა-რიკა (მეექვსე ადგილი) და მექსიკა (მეათე ადგილი). ათეულში ადგილი შეინარჩუნეს დანიამ (2), ისლანდიამ (3) და შვედეთმა (4). რაც შეეხება ბოლო ადგილს, მას კვლავ ავღანეთი (147) იკავებს. კვლევის თანახმად, მისი მოსახლეობა, განსაკუთრებით კი ქალები, თავისი მდგომარეობით ძალიან უკმაყოფილოა.
ანგარიში, რომლის გამოქვეყნების თარიღიც ბედნიერების საერთაშორისო დღეს, 20 მარტს ემთხვევა, საკონსულტაციო კომპანია Gallup-ის, ოქსფორდის უნივერსიტეტის კეთილდღეობის კვლევის ცენტრისა და გაერო-ს მდგრადი განვითარების სარედაქციო საბჭოს თანამშრომლობის შედეგად მომზადდა.
აშშ სულ უფრო და უფრო ნაკლებად ბედნიერი ხდება
მეორე მხრივ, ამერიკის შეერთებულმა შტატებმა თავისი შედეგი ყველაზე მეტად გააუარესა და მე-11 ადგილიდან (2011 წ.) 24-ე ადგილზე გადაინაცვლა.
დოკუმენტში აღნიშნულია, რომ ბოლო ორი ათწლეულის განმავლობაში აშშ-ში 53%-ით გაიზარდა იმ ადამიანების რაოდენობა, რომლებიც მარტო (ცალკე) იკვებებიან. ეს ფაქტი იმით არის საინტერესო, რომ ინდივიდუალიზმს წარმოაჩენს, თუმცა ეწინააღმდეგება მათ თეზისს, ვინც ამტკიცებს, რომ ერთად კვებას ბედნიერება მოაქვს.
ზოგიერთმა ევროპულმა ქვეყანამ, როგორიცაა, მაგალითად, ლიეტუვა (16) და სლოვენია (19), მნიშვნელოვან წინსვლას მიაღწია. ქვეყნები, რომლებმაც ბოლო კვლევისას ყველაზე მაღალი ქულები მიიღო, ცენტრალურ და აღმოსავლეთ ევროპაში მდებარეობს. ესენია: სერბეთი (31), რუმინეთი (35), ლატვია (51), ბულგარეთი (85) და საქართველო (91).
ბედნიერი ქვეყნების ჩამონათვალში ნიდერლანდები მეხუთე ადგილზეა და ნორვეგიასთან (7) და ლუქსემბურგთან (9) ერთად ტოპ-ათეულში შედის.
გერმანია, რომელიც გასულ წელს 24-ე ადგილამდე დაეშვა, ამჯერად ორი პოზიციით დაწინაურდა (22-ე). მას მოდევს გაერთიანებული სამეფო, პოლონეთი (26), საფრანგეთი (33), იტალია (40), მალტა (48) და პორტუგალია (60).
რუსეთმა, რომელიც 2022 წლიდან უკრაინასთან ომშია ჩაბმული, 72-ე ადგილიდან 66-ე ადგილზე გადაინაცვლა, ხოლო უკრაინა ექვსი პოზიციით ჩამოქვეითდა (111-ე); ისრაელმა, რომელიც კვლავ აგრძელებს ღაზის დაბომბვას, სამი პოზიციით უკან დაიწია და მერვე ადგილზეა, ხოლო პალესტინა 103-ე ადგილიდან 108-ე ადგილზე გადავიდა.
ეს რეიტინგები ეფუძნება ცხოვრების ბოლო სამი წლის ხარისხის საშუალო მაჩვენებელს. ის სხვადასხვა კომპონენტით ფასდება: მთლიანი შიდა პროდუქტით, სიცოცხლის ხანგრძლივობით, თავისუფლების განცდით, კორუფციის აღქმით დაწყებული და იმით დამთავრებული, ჰყავთ თუ არა ადამიანებს ისეთი ვინმე, ვისი იმედიც შეუძლიათ ჰქონდეთ.
rtve.es
კომენტარები