2024 წელს ევროკავშირში თავშესაფარი საქართველოს 15 060-მდე მოქალაქემ ითხოვა, მხოლოდ 4% დაკმაყოფილდა
ევროკავშირის თავშესაფრის მაძიებელთა საკითხებზე მომუშავე სააგენტოს (EUAA) მიერ გამოქვეყნებული წლიური ანგარიშის თანახმად, თავშესაფრის მოთხოვნის თაობაზე განაცხადების რაოდენობა ევროკავშირში, ნორვეგიასა და შვეიცარიაში 2024 წელს 11%-ით შემცირდა, თუმცა ზედიზედ მეორე წელია, ერთ მილიონს აღემატება. მთლიანობაში 2024 წელს ევროკავშირში თავშესაფარი 1 014 420-მა ადამიანმა მოითხოვა, 2023 წელს კი თავშესაფრის მთხოვნელთა რიცხვი 1 143 437-ს შეადგენდა.
სააგენტოს ანგარიშში აღნიშნულია, რომ საქართველოს მოქალაქეების განაცხადები აღიარების კოეფიციენტი 2024 წელს დაახლოებით 4% იყო, რაც ერთ-ერთი ყველაზე დაბალი მაჩვენებელია. 2024 წელს ევროკავშირის ქვეყნებში თავშესაფრის მიღების მოთხოვნით საქართველოს მოქალაქეების 15 059 განაცხადი შევიდა. 2023 წელს მათი რაოდენობა 25 209-ს შეადგენდა. დოკუმენტში ასევე ნათქვამია, რომ საქართველოს მოქალაქეების განმეორებითი განაცხადების მაჩვენებელი საკმაოდ მაღალია და 17%-ს შეადგენს. აღნიშნულია, რომ საქართველოს მოქალაქეებმა განმეორებითი განაცხადით, ძირითადად, საფრანგეთში, გერმანიასა და ბელგიაში გააკეთეს.
ყველაზე მეტ განაცხადზე დადებითი გადაწყვეტილება მიღებული იყო შემდეგი ქვეყნების მოქალაქეებისთვის: სირია (90%), მალი (84%), ერითრეა (81%), უკრაინა (80%), ავღანეთი (63%) და სომალი (60%). სწორედ ამ ქვეყნების მოქალაქეთა განაცხადებს აქვს დაკმაყოფილების ყველაზე დიდი შანსი. თუმცა „ევრონიუსი“ აღნიშნავს, რომ განაცხადების აღიარების მაჩვენებელი სხვადასხვა ქვეყანაში განსხვავებულია. მაგალითად, ავღანელებს, რომლებმაც საბერძნეთში შეიტანეს განაცხადი, 98%-იანი აღიარების მაჩვენებელი ჰქონდათ, ხოლო მათ, ვინც ბელგიას მიმართა, აღიარების გაცილებით დაბალი, 39%-იანი მაჩვენებელი ჰქონდათ. განაცხადების აღიარების ყველაზე დაბალი მაჩვენებელი კი აქვს თურქეთის, ნიგერიის, პაკისტანის, კოლუმბიის, ტუნისის, მაროკოს, ბანგლადეშისა და საქართველოს მოქალაქეების მიერ წარდგენილ განაცხადებს თავშესაფრის მიღების თაობაზე.
კომენტარები