ცნობილი ფრანგი (კონგოური წარმოშობის) რეპერი, პროდიუსერი და სიმღერების ავტორი, რომლის პროფესიული სახელია მეტრ-ჟიმსი (Maître Gims) ან უბრალოდ ჟიმსი (Gims), თავის ოფიციალურ ინსტაგრამზე აქვეყნებს ვიდეოს, როგორ მღერის ფრანგულად აჭარულ „განდაგანას“.
ინსტაგრამზე რეპერის ვიდეოს ბევრი ქართველი გამოეხმაურა:
„აგუგუნდა აჭარული სატრფიალო პაღიშიი!
ქართველი ხალხი ამ ვიდეოს ხვალ ნახავს, დანარჩენი უკვე კინოა😀“.
„ტიპს იმდენი მოწონება და ნახვა აქვს, მე მგონი გადავა ქართულ რეპერტუარზე“.
„იმედია, რომ გაჰიტდება ქართული „აჭარული განდაგანა“-ს მუსიკაზე შექმნილი სიმღერა. მოუთმენლად ველი 21 თებერვალს“.
უნდა ითქვას, რომ ფრანგული ტექსტი აჭარულ მელოდიას ნამდვილად ძალიან უხდება.
View this post on Instagram
38 წლის რეპერი, რომლის ნამდვილი სახელი და გვარია Gandhi Alimasi Djuna, ძალიან პოპულარულია – მის სიმღერებს youtube-ზე ათობით მილიონი ნახვა აქვს, მაგ., 5 თვის წინათ განთავსებული სიმღერის – SOIS PAS TIMIDE ოფიციალურ ვიდეოს 69 მილიონამდე ნახვა აქვს, 8 თვის წინათ განთავსებულ SPIDER-ს (GIMS & DYSTINCT) – 139 მლნ-ზე მეტი ნახვა, 9 წლის წინათ განთავსებული Est-ce que tu m’aimes (ალბომიდან Mon cœur avait raison) კი ამ დროისთვის 514 მლნ-ზე მეტმა ადამიანმა ნახა.
ახლა მის თაყვანისმცემლებს, როგორც ეტყობა, ქართველებიც შეუერთდებიან.
კარიერის დაწყებიდან დღემდე ჟიმსმა 5 მლნ-ზე მეტი ჩანაწერი გაყიდა, 3 მლნ-ზე მეტი ალბომის ჩათვლით.
თავისი პროფესიული კარიერის განმავლობაში იგი მუშაობდა რამდენიმე საერთაშორისო არტისტთან, როგორებიც არიან: Sia, Pitbull, Lil Wayne, Stromae, Maluma, Sting და სხვები.
მოკლედ, ხუმრობით რომ ვთქვათ, „რა კაცს ვყვარებივართ“! 😀
ნინო ხოშტარია
კომენტარები