ემანუელ მაკრონის „გზავნილი ქართველებს“ საქართველოსთვის ევროკავშირის წევრობის კანდიდატის სტატუსის მინიჭების წლისთავის წინა დღეს (ვიდეო)

საფრანგეთის პრეზიდენტი ემანუელ მაკრონი თავის ოფიციალურ ფეისბუქგვერდზე  ქართველი ხალხისადმი ვიდეომიმართვას ავრცელებს და აცხადებს, რომ საქართველოს კონსტიტუციაში ჩაწერილი ქართველი ხალხის ევროპული მისწრაფებების ღალატი არ შეიძლება და საქართველოს ევროპული ოცნება არ უნდა ჩაქრეს. „Message aux Géorgiens“ (ფრანგ. „გზავნილი ქართველებს“) – წერს რესპუბლიკის პრეზიდენტი ვიდეომიმართვის აღწერაში.  

„ძვირფასო ქართველო მეგობრებო! საქართველოსთვის ევროკავშირის წევრობის კანდიდატის სტატუსის მინიჭების წლისთავის წინა დღეს მნიშვნელოვნად მივიჩნიე, ეს გზავნილი გადმომეცა ამ მოკლე ვიდეოს საშუალებით.

პირველ რიგში, მინდა, გითხრათ, რომ საქართველოს კონსტიტუციაში ჩაწერილი ქართველი ხალხის ევროპული მისწრაფებების ღალატი არ შეიძლება. საქართველოს ევროპული ოცნება არ უნდა ჩაქრეს. ევროპული გზის ეს არჩევანი თქვენი სუვერენული გადაწყვეტილებაა, ევროპულ ოჯახთან შეერთების ეს არჩევანი არის ის, რაც დღეს მშვიდობიანად გამოხატულია თბილისში და ქვეყნის რამდენიმე ათეულ ქალაქშიც. საქართველოსთვის კანდიდატის სტატუსის მინიჭებით, ევროპულმა საბჭომ დადებითი პასუხი გასცა ამ მისწრაფებას. ეს არჩევანი გულისხმობს გარკვეული მოვალეობებისა და ვალდებულებების შესრულებას დროთა განმავლობაში. გზა დასახულია, საქართველოს ახლა შეუძლია, ხელიხელჩაკიდებულმა იმუშაოს ევროკავშირის 27 წევრ სახელმწიფოსთან თავდაჯერებულად, რათა ააშენოს ეს ევროპული მომავალი ან დაელოდოს და გადაავადოს, მაგრამ რას დაელოდოს და რატომ?

ვუბრუნდები იმას, თუ რას წარმოადგენს ეს ევროპული არჩევანი. ევროკავშირი არ ავალდებულებს. ევროპა სთავაზობს თანასწორი პარტნიორობის გზის დასახვით, კეთილდღეობისა და საერთო ღირებულებებისთვის. ევროპა არ აშინებს, არ იყენებს მუქარას. ევროპა არ ცდილობს ქაოსის დათესვას, ევროპა არ ცდილობს მეზობლების დესტაბილიზაციას ან დამორჩილებას ომით ან ჰიბრიდული საშუალებებით. ის არ ცდილობს თავის მოქალაქეებს შორის განხეთქილების ან დაბნეულობის დათესვას.

ევროკავშირი პატივს სცემს ხალხთა სუვერენულ ნებას, ერების ისტორიასა და იდენტობას, როგორიცაა ქართველი ხალხის ათასწლოვანი ისტორია. ევროკავშირი არ კარნახობს, რა არის ეროვნული ინტერესი. ის პატივს სცემს ტერიტორიულ მთლიანობას, კერძოდ, საქართველოსას. ევროკავშირი არ უჭერს მხარს სეპარატისტებს თქვენს ქვეყანაში. ევროკავშირი წარმოადგენს მშვიდობის პროექტს, რომელიც ევროპის მშენებლობის საფუძველია მისი დაარსებიდან. ევროკავშირს არც აგრესიული ომი დაუწყია სუვერენული სახელმწიფოს წინააღმდეგ. დიახ, ევროპა – ეს არის სოლიდარობა, მშვიდობის არჩევანი, ერთი ოჯახისთვის საერთო სტრატეგიული ინტერესების კოლექტიური დაცვა. ევროპა არ არის შანტაჟი, ეს არის წესების მიღება, როგორც უთანხმოებების მოგვარების საშუალება. საქართველოს გადასაწყვეტია თავისი ბედი. ამისთვის კი ქართველების ხმას უნდა მოუსმინონ და პატივი სცენ.

დაბოლოს, მინდა, კიდევ ერთხელ გითხრათ, რომ ჩვენ თქვენ გვერდით ვდგავართ თქვენი ევროპული და დემოკრატიული მისწრაფებების მხარდასაჭერად. საქართველოს ვერ ექნება ევროპულ გზაზე წინსვლის იმედი, თუ მშვიდობიან დემონსტრაციებს ძალის არაპროპორციული გამოყენებით ახშობენ, თუ სამოქალაქო საზოგადოების ორგანიზაციებს, ჟურნალისტებს, ოპოზიციური პარტიების წევრებს ავიწროებენ, თუ გამოხატვისა და შეკრების თავისუფლებას არ იცავენ. მინდა, მჯეროდეს, რომ არსებობს გზა ქვეყნის ევროპული მისწრაფებების შესაბამისად, გზა ღია, თავაზიანი დიალოგისა ყველა პოლიტიკურ ძალასა და სამოქალაქო საზოგადოების ორგანიზაციასთან. ეს დიალოგი ყველა ქართველის პასუხისმგებლობაა. მან ქართველებს საშუალება უნდა მისცეს, ხელახლა აიღონ ხელში საკუთარი ბედი. ეს გზა თქვენია. ამიტომაც დიდი ნდობა მაქვს ქართველი ხალხის მიმართ და დიდი ნდობა მაქვს ყველას მიმართ, ვისთვისაც ძვირფასია ეს პატივსაცემი ევროპული გზა და არ სურს, დანებდეს დაშინებას, პროპაგანდას, კიბერშეტევებს, ინფორმაციის მანიპულაციას.

გაუმარჯოს საქართველოსა და საფრანგეთის მეგობრობას და გაუმარჯოს ევროპას!“ – ნათქვამია ემანუელ მაკრონის ვიდეომიმართვაში.

შეგახსენებთ, რომ 11 დეკემბერს საფრანგეთის პრეზიდენტი ემანუელ მაკრონი, თავისი ინციატივით, ტელეფონით ესაუბრა „ქართული ოცნების“ საპატიო თავმჯდომარეს ბიძინა ივანიშვილს. მაკრონმა დაგმო სამოქალაქო საზოგადოების წარმომადგენელთა და ოპოზიციის დაშინება, ასევე, უსაფრთხოების ძალების მიერ მშვიდობიან დემონსტრანტებსა და ჟურნალისტებზე განხორციელებული ძალადობა. საფრანგეთის პრეზიდენტმა მოითხოვა, გათავისუფლდეს ყველა ადამიანი, რომელიც უკანონოდ დააკავეს და მოუწოდა [ივანიშვილს], რომ პატივი სცენ გამოხატვისა და შეკრების თავისუფლებას.

ამავე თემაზე: რა უთხრა მაკრონმა ივანიშვილს? – ელისეს სასახლის განცხადება და „ქართული ოცნების“ განმარტება