საქართველოს ნაკრებმა უეფას ერთა ლიგის მეხუთე ტურის შეხვედრაში უკრაინის ნაკრებს უმასპინძლა ბათუმში. გადაუღებელ წვიმაში დაძაბული და სანახაობრივი შეხვედრა ფრედ 1:1 დასრულდა.
საქართველოს ნაკრებმა თამაში აქტიურად დაიწყო, ქართველებმა თავიდანვე რამდენიმე მწვავე მომენტი შექმნეს, თუმცა მოედნის ცენტრში ქოჩორაშვილის შეცდომამ მოწინააღმდეგეს საშუალება მისცა, სწრაფი შეტევა განეხორციელებინა და მოედნის ცენტრში მიხაილო მუდრიკის სახიფათო გადაცემა საბა კვირკველიამ საკუთარ კარში ჩაჭრა ბურთი. უკრაინელებმა მე-7 წუთზე ერთბურთიან უპირატესობასთან ერთად ფსიქოლოგიური უპირატესობაც მოიპოვეს და უფრო თავდაჯერებულად დაიწყეს თამაში.
მთელი პირველი ნახევარი ქართველები უფრო მეტად აკონტროლებდნენ ბურთს, თუმცა რეალური საგოლე მომენტების შექმნა ვეღარ შეძლეს. უკრაინელებმაც კონტრშეტევაზე რამდენჯერმე კარგად გაამწვავეს თამაში და საგოლე მომენტებიც ჰქონდათ, თუმცა საქართველოს ნაკრების მცველი მოწოდების სიმაღლეზე იყო – მამარდაშვილმა საკუთარი კარი აშკარა გოლისგან იხსნა. პირველი ტაიმი უკრაინელების ერთბურთიანი უპირატესობით დასრულდა 0:1.
მეორე ტაიმში ვილი სანიოლმა მოედანზე გიორგი ჩაკვეტაძის ნაცვლად ზურიკო დავითაშვილი შეიყვანა. „სენტ-ეტიენის“ ქართველ ფორვარდს შესვლისთანავე ხვიჩა კვარაცხელიას შესანიშნავი გადაცემის შემდეგ ანგარიშის გათანაბრება შეეძლო, მაგრამ ახლო მანძილიდან კარს ააცილა.
ხვიჩა კვარაცხელია ძალიან აქტიურობდა, თამაშს საკუთარ თავზე იღებდა და გამწვავებას ცდილობდა, 62-ე წუთზე შესანიშნავად დაარტყა, თუმცა მეტოქის კარი ძელმა იხსნა.
მოედანზე შესვლიდან რამდენიმე წამში ანგარიშის გათანაბრება გიორგი მიქაუტაძესაც შეეძლო, თუმცა რეალური შანსი ვერ გამოიყენა, თუმცა 76-ე წუთზე მაინც მოახერხა გატანა. კაკაბაძის გადაცემის შემდეგ ქოჩორაშვილის დარტყმა მეკარემ მოიგერია, მაგრამ „ლიონის“ ქართველმა თავდამსხმელმა დამატებაზე ზუსტად ითამაშა და ანგარიში გაათანაბრა – 1:1.
ქართველებმა ამ გოლის შემდეგ უფრო დიდი ძალებით შეუტიეს, ისევ კვარაცხელია და მიქაუტაძე შეეცადნენ გოლის გატანას, თუმცა უშედეგოდ. კონტრშეტევაზე უკრაინელებსაც ჰქონდათ რეალური შანსი, მაგრამ მამარდაშვილმა კვლავ აჩვენა უმაღლესი კლასი და საქართველოს ნაკრების მეორე გოლს გადაარჩინა.
საბოლოოდ, მატჩი ფრედ 1:1 დასრულდა.
საქართველოს ნაკრები ამ დროისთვის ჯგუფში მეორე ადგილზეა 7 ქულით და ბურთების სხვაობით უსწრებს მესამე პოზიციაზე მყოფ ალბანეთის ნაკრებს, რომელსაც ასევე 7 ქულა აქვს ჩეხეთთან ფრედ (0:0) დასრულებული შეხვედრის შემდეგ. ჩეხეთი კი ჯგუფის ლიდერია 8 ქულით. უკრაინას 5 ქულა აქვს და ბოლო ადგილზეა.
შეგახსენებთ, რომ ჩეხეთის ნაკრებთან გასვლით შეხვედრას საქართველო 19 ნოემბერს გამართავს ოლომოუცში. თამაში თბილისის დროით 23:45 სთ-ზე დაიწყება.
ნუცა ყაველაშვილი
კომენტარები