დათვლილია ხმების თითქმის 100%, მმართველი პარტია ლიდერობს, ოპოზიცია არჩევნების შედეგებს არ ცნობს

ცესკოს ამ დროინდელი მონაცემებით (27 ოქტომბერი, 17:00 სთ), სულ არსებული 3111 საარჩევნო უბნიდან დათვლილია 3109-ის (99.936%) ხმები და მიღებული წინასწარი შედეგებით „ქართული ოცნება“ ლიდერობს. ოპოზიცია ცესკოს მიერ გამოქვეყნებულ შედეგებს არ აღიარებს, „ქართულ ოცნებას“ ხელისუფლების უზურპაციაში ადანაშაულებს და პერმანენტულ საპროტესტო აქციებს აანონსებს.  

ბიულეტენების 99.936%-ის დათვლის შემდეგ, ცესკოს თანახმად, არჩევნებში მონაწილე 18 სუბიექტიდან 5%-იანი ზღვარი გადალახა 5-მა საარჩევნო სუბიექტმა:

„ქართული ოცნება“ – 53.93%

„კოალიცია ცვლილებებისთვის – გვარამია, მელია, გირჩი, დროა“ – 11.03%

„ერთიანობა – ნაციონალური მოძრაობა“ – 10.161%

„ძლიერი საქართველო – ლელო, ხალხისთვის, თავისუფლებისთვის“ – 8.814%

„გახარია საქართველოსთვის“ – 7.771%

ცესკოს თანახმად, წინასწარი მონაცემებით, მთლიანობაში ოპოზიციას ხმების 37.776% აქვს მიღებული.

„ქართულმა ოცნებამ“ თბილისში ამომრჩეველთა ხმების 42.8% მიიღო – დედაქალაქის 10 საარჩევნო ოლქიდან ყველაზე ნაკლებმა მომრჩეველმა მმართველ პარტიას ვაკეში დაუჭირა მხარი (38.034%), ყველზე მეტმა – კრწანისში (48,856%);

საზღვარგარეთ მყოფი ამომრჩევლების 34 290 ხმიდან „ოცნებამ“ 13.379% მიიღო, ყველაზე მეტი კი  – 33.263% – „კოალიციამ ცვლილებისთვის“.

არჩევნების დასრულების შემდეგ, ცესკოს მიერ პირველი მონაცემების გამოქვეყნებამდე ცნობილი გახდა 3 სხვადასხვა ორგანიზაციის მიერ ჩატარებული ეგზიტპოლების შედეგები, რომლებიც მკვეთრად განსხვავებული იყო. „ტელეიმედის“ დაკვეთით „გორბის“ მიერ ჩატარებული ეგზიტპოლის თანახმად, „ქართულმა ოცნებამ“ ხმების 56.1% მიიღო, „ფორმულასა“ და „მთავარის“ დაკვეთით ჩატარებული ეგზიტპოლების თანახმად კი – მმართველმა პარტიამ ხმების მხოლოდ 40-42% მიიღო.

ამის საფუძველზე ოპოზიციური პარტიის ლიდერებმა გააკეთეს განცხადებები, რომ დაშინებისა და ძალადობის მიუხედავად ქართველმა ხალხმა და მისმა ევროპულმა არჩევანმა გაიმარჯვა და „ივანიშვილის დრო დამთავრდა“.

გამარჯვებაში თავიდანვე დარწმუნებული იყო „ქართული ოცნების“ ლიდერი ბიძინა ივანიშვილიც, რომელმაც განაცხადა: „ეს იშვიათი შემთხვევაა მსოფლიოში, როდესაც ერთი და იგივე პარტია აღწევს ასეთ წარმატებებს ასეთ რთულ სიტუაციაში“.

მიუხედავად იმისა, რომ მმართველ პარტიას ოპოზიცია კურსის შეცვლაში, ქვეყნის საერთაშორისო იზოლაციისკენ წაყვანასა და რუსეთის ინტერესების გატარებაში სდებენ ბრალს, „ქართული ოცნება“ აცხადებს, რომ საქართველო ევროკავშირისკენ სხვლას განაგრძობს და ქვეყანა ევროკავშირის წევრი აუცილებლად გახდება. იგი არჩევნებს უწოდებს რეფერენდუმს ევროპული მომავლისა და იზოლაციას შორის არჩევანის, არამედ ომსა და მშვიდობას შორის არჩევანის გასაკეთებლად. პატარა პარტიებისგან შემდგარი ოპოზიცია კი თავს პროდასავლურს უწოდებს და აცხადებს, რომ ომსა და მშვიდობას შორის არჩევანის თემა მმართველ პარტიას ხალხის დასაშინებლად და ხელისუფლებაში კიდევ 4 წლით დასარჩენად სჭირდება.

ოპოზიციის ლიდერების თქმით, ისინი არ აღიარებენ არჩევნების ოფიციალურ შედეგებს, მმართველ პარტიას მასშტაბურ გაყალბებასა და დარღვევებში სდებენ ბრალს და ამბობენ, რომ უწყვეტი აქციებით გააგრძელებენ ბრძოლას ამომრჩეველთა ხმების დასაცავად.