ჯანდაცვის მსოფლიო ორგანიზაციამ ვირუსული ინფექციის, მაიმუნის ყვავილის გავრცელებასთან დაკავშირებით განგაშის უმაღლეს დონე გამოაცხადა. ინფექციამ აფრიკაში კონგოს დემოკრატიულ რესპუბლიკაში იფეთქა. წლის დასაწყისიდან ქვეყანაში მაიმუნის ყვავილის ახალი შტამის 17 000-ზე მეტი შემთხვევა დაფიქსირდა. დაიღუპა 517 ადამიანი.
„მაიმუნის ყვავილმა“ 13 ქვეყანა მოიცვა. პირველი შემთხვევა ევროპაშიც დაფიქსირდა. ამის შესახებ ინფორმაციას „ბიბისი“ ავრცელებს. შვედეთმა დაადასტურა, რომ მის ტერიტორიაზე აფრიკაში გავრცელებული დაავადება – მაიმუნის ყვავილი აღმოჩნდა.
Mpox – ცნობილი, როგორც მაიმუნის ყვავილი, არის ვირუსული დაავადება, რომელიც ადვილად ვრცელდება ადამიანებსა და ინფიცირებულ ცხოველებს შორის. ჯანდაცვის მსოფლიო ორგანიზაციის თანახმად, ვირუსი შესაძლოა გავრცელდეს მჭიდრო კონტაქტით, შეხებით, კოცნით ან სექსუალური გზით. ძირითადად, გადამდებია დაბინძურებული ცხოველის ან ადამიანის ყველანაირი გამონაყოფიდან – ეს იქნება ნერწყვი, სპერმა, შარდი და ა. შ.
ვირუსი ასევე შეიძლება გადავიდეს ერთი ადამიანიდან მეორეზე თეთრეულით, ტანსაცმლით და ნემსით. მაიმუნის ვირუსისთვის დამახასიათებელი სიმპტომებია: ციებ-ცხელება, მტკივნეული გამონაყარი, თავის ტკივილი, კუნთებისა და ზურგის ტკივილი, ენერგიის ნაკლებობა, მარტივი დაღლა და გაფართოებული ლიმფური კვანძები.
ცხელებით (>38.3⁰C) მიმდინარე მწვავე დაავადება, რომელსაც თან ახლავს თავის ძლიერი ტკივილი, ლიმფოადენოპათია, წელის ტკივილი, მიალგია, ძლიერი სისუსტე და 1-3 დღის შემდეგ განვითარებული პროგრესული გამონაყარი, რომელიც ხშირად სახიდან იწყება და შემდეგ ვრცელდება სხეულის სხვა ნაწილებზე, მათ შორის, ფეხის ტერფებსა და ხელის გულებზე.
მაიმუნის ყვავილის სიმპტომები ჩვეულებრივი ყვავილის მსგავსია, თუმცა გაცილებით მსუბუქად მიმდინარეობს. ინკუბაციური პერიოდი 5-დან 21 დღემდეა (უპირატესად, 7-14 დღე).
მკურნალობა შესაძლებელია ყვავილის საწინააღმდეგო პრეპარატებით.
ნანა ძნელაძე
შეგახსენებთ, რომ 2022 წლის ივნისში საქართველოში „მაიმუნის ყვავილის“ ვირუსის ერთი შემთხვევა დადასტურდა.
კომენტარები