როგორ უნდა აიღოთ საერთაშორისო მართვის მოწმობა და სად იმოქმედებს დოკუმენტი
მომსახურების სააგენტომ ჟენევის კონვენციით გათვალისწინებული საერთაშორისო მართვის მოწმობის გაცემა დაიწყო
თუ საქართველოში უკვე ფლობთ მართვის მოწმობას, შეგიძლიათ აიღოთ დოკუმენტი, რომლითაც არაერთ ქვეყანაში ავტომობილით უპრობლემოდ მგზავრობას შეძლებთ. ერთწლიანი მოწმობა გაიცემა ჟენევის კონვენციის წევრი ქვეყნების შემთხვევაში, 3-წლიანი – ვენის კონვენციის წევრი ქვეყნების შემთხვევაში.
მომსახურების სააგენტომ „საგზაო მოძრაობის შესახებ“ ჟენევის 1949 წლის 19 სექტემბრის კონვენციით გათვალისწინებული საერთაშორისო მართვის მოწმობის გაცემა დაიწყო. ინფორმაციას ამის შესახებ მომსახურების სააგენტო ავრცელებს.
ჟენევის კონვენციის წევრი ქვეყნების ჩამონათვალი იხილეთ ბმულზე.
მომსახურების სააგენტოს ცნობით, საერთაშორისო მართვის მოწმობა გაიცემა ერთი წლის ვადით, ეროვნული მართვის მოწმობის საფუძველზე და დოკუმენტი მოქმედებს საქართველოს ფარგლებს გარეთ, ჟენევის კონვენციის წევრ ქვეყნებში.
ამასთან, მომსახურების სააგენტოს მიერ ასევე გაიცემა „საგზაო მოძრაობის შესახებ“ ვენის 1968 წლის 8 ნოემბრის კონვენციით გათვალისწინებული საერთაშორისო მართვის მოწმობაც, რომელიც მოქმედია სამი წლის ვადით.
ვენის კონვენციის წევრი ქვეყნების ჩამონათვალი იხილეთ ბმულზე.
სააგენტოს ცნობით, დოკუმენტი მოქმედებს საქართველოს ფარგლებს გარეთ, ვენის კონვენციის წევრ ქვეყნებში.
საერთაშორისო მართვის მოწმობის მისაღებად საჭიროა დაინტერესებულმა პირმა მომსახურების სააგენტოში წარმოადგინოს:
პირადობის დამადასტურებელი დოკუმენტი;
ეროვნული მართვის მოწმობა.
საერთაშორისო მართვის მოწმობის საფასურია 109 ლარი. დოკუმენტი იმავე დღეს გაიცემა, როდესაც მომსახურების სააგენტოში განაცხადს გააკეთებთ.
იმისათვის, რომ საერთაშორისო მართვის მოწმობა მიიღოს, მოქალაქე უნდა იყოს ადგილზე, საქართველოში. მინდობილობით და ონლაინ ეს დოკუმენტი არ გაიცემა.
კომენტარები