იტალიელი მასწავლებელი ქალი უნგრეთში განხორციელებული თავდასხმის გამო სასამართლოს წინაშე წარდგება

იტალიელი აქტივისტი ქალი უნგრეთში განხორციელებული თავდასხმის გამო სასამართლოს წინაშე წარდგება

იტალიელი ანტიფაშისტი აქტივისტი ქალი, რომელიც უნგრეთში, ნეონაცისტებზე სავარაუდო თავდასხმაშია ბრალდებული, სასამართლოს წინაშე წარდგება. 39 წლის ილარია სალისის საქმე რომსა და ბუდაპეშტს შორის დაძაბულობას იწვევს. მისი საქმე იტალიური მედიის ყურადღების ცენტრში მას შემდეგ მოექცა, რაც ის იანვარში, ბუდაპეშტის სასამართლოში, ხელებზე და ფეხებზე ბორკილებდადებული მიიყვანეს. იტალიის პრემიერ-მინისტრი, ჯორჯია მელონი უნგრეთის მმართველ ვიქტორ ორბანთან თბილ ურთიერთობას ინარჩუნებს, მაგრამ ილარია სალისის ქმედებამ ამ ურთიერთობებში ორმხრივი დაძაბულობა შეიტანა და რომმა, სალისის სახელით, საჩივარი ოფიციალურად წარადგინა. მილანის მახლობლად მდებარე მონცაში მცხოვრები მასწავლებელი ბუდაპეშტში გასული წლის თებერვალში დააკავეს.

პროკურორების მტკიცებით, სალისი სპეციალურად გაემგზავრა ბუდაპეშტში, რათა განეხორციელებინა თავდასხმები „ამის შესახებ საქმის კურსში არმყოფ პირებზე, რომლებიც ულტრამემარჯვენეების მხარდამჭერებად აღიქმებოდნენ“ და ამ გზით, „ულტრამემარჯვენე მოძრაობის წარმომადგენლები“ დაეშინებინა. მას ბრალი თავდასხმის მცდელობის სამი მუხლით წაუყენეს და იმ ულტრამემარცხენე კრიმინალური ორგანიზაციის წევრობაში დაადანაშაულეს, რომელიც ნეონაცისტების ყოველწლიური მიტინგის საწინააღმდეგო კონტრდემონსტრირებს მართავდა. სალისი უარყოფს ბრალდებას, რომლითაც მას 11 წლამდე თავისუფლების აღკვეთა ემუქრება და ამბობს, რომ მას პოლიტიკური შეხედულებების გამო დევნიან. გასულ კვირას „ლა სტამპაში“ გამოქვეყნებულ ინტერვიუში, სალისმა, მამის მეშვეობით, აღნიშნა რომ ის „ისტორიის სწორ მხარეს დგას“.

როგორც სალისის ერთ-ერთმა უნგრელმა იურიდიულმა წარმომადგენელმა აღნიშნა, ერთ-ერთი მსხვერპლის და თავდასხმის ერთ-ერთი მოწმის ჩვენების მიცემა პარასკევს არის დაგეგმილი. სასამართლო პროცესის წინ, ადვოკატმა დიორდ მადიარმა სააგენტო „ფრანს პრესთან“ დაიჩივლა, რომ საქმის ყველა მასალა, „მის მშობლიურ ენაზე“, სალისს ჯერ კიდევ არ მიუღია. „თარჯიმნები მას დაჰპირდნენ, რომ დოკუმენტების თარგმნას ნოემბერში დაასრულებდნენ, სანამ ეს არ მოხდება, ილარია არანაირ მნიშვნელოვან ჩვენებას არ აძლევს და სწორადაც იქცევა“, – დასძინა მან. მამამისის, რობერტო სალისის თქმით, მისმა შვილმა გისოსებს მიღმა 15 თვეზე მეტი გაატარა და შინაპატიმრობაში ხუთშაბათს, 23 მაისს, 16 მილიონი ფორინტის (დაახლოებით 41,000 ევრო) გირაოს სანაცვლოდ გადაიყვანეს.

ევროპარლამენტის წევრად არჩევის შემთხვევაში, ის, შესაძლოა, საქმეზე განაჩენის გამოტანამდე გაათავისუფლონ. გასულ თვეში, იტალიის „მწვანეთა და მემარცხენეთა ალიანსმა“ (AVS) სალისი მომავალ ევროპულ არჩევნებში თავის მთავარ კანდიდატად წარადგინა. თუ პარტია არჩევნებში საკმარის ხმებს მიიღებს, სალისს, შესაძლოა, სადეპუტატო იმუნიტეტი მიენიჭოს, რაც მის წინააღმდეგ მიმდინარე სისხლის სამართლის პროცესის შეჩერებას გამოიწვევს.

პოლიტიზებული საქმე

ილარია სალისის საქმე ძალზე პოლიტიზირებულია და უნგრეთის მთავრობა ხშირად აკეთებს მასზე კომენტარს. რობერტო სალისი უნგრეთის ხელისუფლებას ორმაგ სტანდარტებში ადანაშაულებს და აცხადებს, რომ ის ბევრად უფრო რბილად იქცევა ნეონაცისტების მიმართ, რომლებიც ანტიფაშისტ აქტივისტებს დაახლოებით იმავე დროს, თითქოს, თავს დაესხნენ. „ამ ქვეყანაში ეს ადამიანები პატრიოტებად ითვლებიან, ანტიფაშისტები კი – სახელმწიფოს მტრებად“, – განუცხადა რობერტო სალისმა „ფრანს პრესს“. ის ამტკიცებს, რომ იანვრამდე , სანამ საქმეს მედია ფართოდ გააშუქებდა, მისი ქალიშვილი არაადამიანურ პირობებში იმყოფებოდა.

„რვა დღის განმავლობაში, ის სამარტოო საკანში ტუალეტის ქაღალდის, ჰიგიენური საფენებისა და საპნის გარეშე იყო. ამ პერიოდში მას ჰიგიენური საფენები სჭირდებოდა… იტალიაში ჩვენ ამას წამებად შევაფასებდით“, – აღნიშნა რობერტო სალისმა. ევროპის საბჭო უნგრეთის ქმედებებს აკრიტიკებს. ევროსტატის მიხედვით, 2022 წელს უნგრეთში, ევროკავშირის მასშტაბით, პატიმრობის ყველაზე მაღალი მაჩვენებელი (საშუალოდ 100 000 ადამიანზე) დაფიქსირდა, შემდეგ კი მოდიან პოლონეთი, ჩეხეთი და სლოვაკეთი.

უნგრეთის ოფიციალური პირები სალისის მიმართ არასათანადო მოპყრობის შესახებ წაყენებულ ბრალდებებს უარყოფენ. პრემიერ-მინისტრ ორბანის ნაციონალისტურმა მთავრობამ არაერთხელ დაგმო მედია იმის გამო, რომ სალისის „წამებულად“ წარმოჩენას ცდილობს, ნაცვლად იმისა, რომ მის მიერ ჩადენილი სავარაუდო დანაშაულების „სისასტიკეზე“ ისაუბროს. „ჩვენ ვხედავთ, რომ ვიღაც სასტიკ დანაშაულს საჯაროდ სჩადის, ევროპული მემარცხენეები კი მის დასაცავად გამოდიან და ცდილობენ, ეს ადამიანი ევროპარლამენტარი გახადონ“, – აღნიშნა ხუთშაბათს, 23 მაისს, ორბანის ადმინისტრაციის უფროსმა, გერგელი გულიასმა. „ეს ჩვენს ყველა ევროპულ ღირებულებასთან, ადამიანურ წესიერებასთან და დანაშაულის დასჯის აუცილებლობასთან შეუთავსებელია“, – დასძინა მან.

სალისის მამა აცხადებს, რომ იტალიის მთავრობა მის ქალიშვილს მხოლოდ „შეზღუდულ“ დახმარებას უწევს. მოსალოდნელია, რომ იტალიის ელჩი უნგრეთში სალისის სასამართლო პროცესს დაესწრება, განუცხადეს „ფრანს პრესს“ საელჩოში.