ტრაგედიით დასრულებული საცდელი გაფრენა რეკორდისთვის მოსამზადებლად – დაიღუპა სამი ადამიანი (ვიდეო)

თეთრიწყაროს მუნიციპალიტეტის სოფელ ასურეთში საჰაერო ბურთი მაღალი ძაბვის ელექტროგადამცემ ხაზს შეეჯახა.

ფოთის ცენტრალური სტადიონიდან კახეთის მიმართულებით საჰაერო ბუშტით „სკაი ტრეველის“ დამფუძნებელი და დირექტორი რევაზ უთურგაური, პოლონელი პილოტი კრიშტოფ ზაპარტი და ტელეკომპანია „იმედის“ ოპერატორი მიშო ბიძინაშვილი გაფრინდნენ.

როგორც აფრენამდე რევაზ უთურგაურმა აღნიშნა, ეს იყო მოსამზადებელი, საცდელი გაფრენა, რის შემდეგაც ისინი მსოფლიო რეკორდის დამყარებას შეეცდებოდნენ საჰაერო ბურთით ყველაზე დიდ მანძილზე გაფრენით.

ტრაგედიამდე რამდენიმე საათით ადრე გავრცელდა რევაზ უთურგაურის ვიდეო, რომელშიც ჩანს, როგორ ათვალიერებინებს  იგი თავის შვილს აღჭურვილობას და უამბობს მომავალი რეკორდის შესახებ, რომლის დასამყარებლადაც ემზადებოდა.

სამოქალაქო ავიაციის სააგენტო სოფელ ასურეთთან მომხდარ უბედურ შემთხვევასთან დაკავშირებით განცხადებას ავრცელებს.

„მიმდინარე წლის 7 თებერვალს სოფელ ასურეთთან მომხდარ საავიაციო შემთხვევასთან დაკავშირებით გაცნობებთ, რომ Cameron Balloons Z-315 ტიპის სითბური აეროსტატი ასრულებდა ფრენას ფოთიდან ვაშლოვანის ეროვნული პარკის მიმართულებით, რის თაობაზეც, ქვეყნის შიდა ფრენებისთვის დადგენილი მოთხოვნების (ICAO-ს საერთაშორისო სტანდარტი) შესაბამისად, მფრინავის მიერ წარდგენილ იქნა საფრენოსნო გეგმა შესაბამის უწყებაში. აეროსტატზე იმყოფებოდა სამი ადამიანი.

დიდ ბრიტანეთში წარმოებული სითბური აეროსტატი Cameron Balloons Z-315 2022 წელს არის გამოშვებული და ამავე წელს დარეგისტრირდა საქართველოს სამოქალაქო საჰაერო ხომალდების სახელმწიფო რეესტრში (სარეგისტრაციო ნომერი 4L-BAV).

აეროსტატს მართავდნენ საქართველოს სამოქალაქო ავიაციის სააგენტოს და პოლონეთის რესპუბლიკის საავიაციო ხელისუფლების მიერ სერტიფიცირებული მფრინავები. სამოქალაქო ავიაციის სააგენტოს მიერ აეროსტატზე ჩატარებული იყო ყველა საჭირო შემოწმება.

საავიაციო შემთხვევის მოკვლევას აწარმოებს სამოქალაქო ავიაციისა და საზღვაო ტრანსპორტის სფეროებში მომხდარი სატრანსპორტო შემთხვევებისა და ინციდენტების მოკვლევის ბიურო. მოკვლევის ამ ეტაპზე საქართველოს სამოქალაქო ავიაციის სააგენტო არ არის უფლებამოსილი, გაასაჯაროოს საავიაციო შემთხვევასთან დაკავშირებული სხვა დეტალები“, – აღნიშნულია განცხადებაში.

სამოქალაქო ავიაციის სააგენტო მწუხარებას გამოთქვამს მომხდარი უბედური შემთხვევის გამო და უსამძიმრებს დაღუპულთა ოჯახებს.