ქართულმა თაფლმა ლონდონში უმაღლესი ჯილდო – პლატინის მედალი მოიპოვა

თაფლის საერთაშორისო კონკურსზე London Honey Awards 2023 სასოფლო-სამეურნეო კოოპერატივ „კოდის“ წარმოებულმა თაფლმა „ნინოწმინდის თაფლი – ალპიდა“ ხარისხის ნომინაციაში უმაღლესი ჯილდო – პლატინის მედალი დაიმსახურა. ინფორმაციას გარემოს დაცვისა და სოფლის მეურნეობის სამინისტრო ავრცელებს.

კოოპერატივმა წელს მესამე მიიღო მონაწილეობა აღნიშნულ კონკურსზე. 2021 წელსაც და 2022 წელსაც მათმა პროდუქციამ ლონდონში ვერცხლის მედალი მოიპოვა.

გარემოს დაცვისა და სოფლის მეურნეობის სამინისტროს ცნობით, თაფლის საერთაშორისო კონკურსი London Honey Awards ლონდონში ყოველწლიურად იმართება. კონკურსში ორ ნომინაციაში ტარდება: თაფლის ხარისხი და შეფუთვა (დიზაინი). კონკურსში მონაწილეობა შეუძლიათ იმ მეწარმეებს, რომლებიც თავად აწარმოებენ პროდუქციას და მხოლოდ საკუთარი წარმოების პროდუქციას ყიდიან.

„კონკურსი London Honey Awards ერთ-ერთი ყველაზე პრესტიჟულია თაფლის წარმოების სექტორში. ყოველწლიურად კონკურსში მონაწილეობს 250-ზე მეტი მწარმოებელი მსოფლიოს სხვადასხვა ქვეყნიდან.

კოოპერატივმა „კოდი“ კონკურსზე London Honey Awards საკუთარი პროდუქცია პირველად 2021 წელს, საქართველოს საელჩოს მხარდაჭერით წარადგინა. London Honey Awards 2021-ზე წარდგენილი იყო „ნინოწმინდის თაფლი – ალპიდა“, რომელმაც ვერცხლის მედალი მოიპოვა. აღნიშნული თაფლი ვერცხლის მედლის მფლობელი გახდა London Honey Awards 2022-ზეც.

სასოფლო-სამეურნეო კოოპერატივი „კოდი“ 2017 წელს ოთხი მეფუტკრის ინიციატივით დაარსდა. დღეისათვის კოოპერატივი 11 წევრს, მათ შორის 4 ქალს აერთიანებს.

2017 წელს შეღავათიანი აგროკრედიტის პროგრამის ფარგლებში კოოპერატივმა შეიძინა ფუტკრის 40 ოჯახი, 100 სკა და გადამმუშავებელი საამქროს სამი დანადგარი, ხოლო მეფუტკრეობის სახელმწიფო პროგრამის ფარგლებში 100 ახალი სკა მიიღო. ამასთან, ავსტრიის განვითარების სააგენტოს გრანტით მოხდა საამქროსათვის დამატებითი აღჭურვილობის შეძენა და თაფლის გადამმუშავებელი საწარმოო ხაზის მოწყობა.

კოოპერატივ „კოდის“ სავაჭრო ნიშანია „ალპიდა“. კოოპერატივი აწარმოებს სხვადასხვა სახის პროდუქტს: „ნინოწმინდის თაფლს“, „ახალციხის თაფლს“, „მაისის თაფლს“, „ანათალის თაფლს“, ფუტკრის რძეს, ყვავილის მტვერს და ფუტკრის დედებს.

2020 წელს საქართველოს ინტელექტუალური საკუთრების ეროვნულ ცენტრში, ,,საქპატენტში“ კოოპერატივმა დაარეგისტრირა „ნინოწმინდის თაფლი“, როგორც გეოგრაფიული აღნიშვნის მქონე პროდუქტი. „ნინოწმინდის თაფლს“ გარემოს დაცვისა და სოფლის მეურნეობის სამინისტროს მიერ მინიჭებული აქვს „ქართული ხარისხის“ და „გეოგრაფიული აღნიშვნის ხარისხის“ ნიშნები, ხოლო ბიოლოგიურ მეურნეობათა ასოციაცია „ელკანას“ მიერ – „აგროეკოლოგიური ხარისხის“ ნიშანი.

2018-2021 წლებში კოოპერატივმა მოიპოვა საერთაშორისო ორგანიზაციების (JICA, USAID zrda, IFAD) გრანტები, რამაც საშუალება მისცა, გაეზარდა პირველადი წარმოება, პროდუქციის ხარისხი და საწარმოში დაენერგა HACCP სტანდარტი. 2018 წლიდან, კოოპერატივ „კოდის“ წარმოებული თაფლი სრულ შესაბამისობაშია ქართულ და ევროპულ მოთხოვნებთან როგორც ხარისხის, ასევე უვნებლობის მიმართულებით. 2022 წელს საამქროში დაინერგა ახალი ტექნოლოგია, რომელმაც საშუალება მისცა მწარმოებელს, შეენარჩუნებინა ბუნებრივი თაფლის მაღალი ხარისხი“, – აღნიშნულია უწყების ინფორმაციაში.