საზოგადოებასაქართველო

„შაქარაშვილის მსგავსი ამბავი ჩვენც გადაგვხდა თავს, თუმცა მაშინ ყველა ღირსეულად მოიქცა…“

მსახიობი გეგა სალუქვაძე Facebook-ში აქვეყნებს მეგობართან, გარდაცვლილ კალათბურთელთან ერთად გადაღებულ ფოტოს და წერს, რომ გიორგი შაქარაშვილის მსგავსი ტრაგედია მათმა სამეგობრომაც გამოიარა, როდესაც მათი მეგობარი მოკლეს, თუმცა იმ შემთხვევაში ბევრი ადამიანი ღირსეულად მოიქცა…

„შაქარაშვილის ტრაგედიას შეგნებულად ვარიდებ ყურადღებას, არა იმიტომ, რომ არ მაინტერესებს, მსგავსი ისტორია ჩვენც გადაგხვდა თავს, აჩიკო რუხაძე (ბაჩუ), ჩვენი სული და გული, მთელი საამხანაგოს ღერძი, ყოვლად უწყინარი და კაცთმოყვარე 22 წლის კალათბურთელი, საბედისწერო ბანკეტზე, ქუჩურმა და კრიმინალურმა მენტალიტეტმა იმსხვერპლა. ამიტომ, იმდენ ასოციაციას იწვევს და ისე მანგრევს დღევანდელი ტრაგედია, რომ მირჩევნია, საერთოდ ავარიდო გონება.

თუმცა, აუცილებლად უნდა აღვნიშნო და გავიხსენო, რამდენად ღირსეულად მოიქცა მაშინ ყველა, პოლიციის ჩათვლით. ჩვენ არც სათვალთვალო კამერები გვქონდა და არც ამდენი საშუალება არსებობდა 2005 წელს.

უშუალო მოწმე არ არსებობდა, მაგრამ ჩემმა გადაღებულმა ვიდეომასალამ და რამდენიმე გოგოს (თქვენი ნებართვის გარეშე არ გთაგავთ) ღირსეულმა და უშიშარმა ჩვენებამ, ხანგრძლივი ძიების შემდეგ, მკვლელის გამოაშკარავება და დასჯა შესაძლებელი გახადა.

რა თქმა უნდა, მაშინაც გამოერია ბევრი ფლიდი ახალგაზრდა, მშობლებითურთ, რომლებსაც თითქოსდა არაფერი ახსოვდათ.

მინდა მოვუწოდო ახალგაზრდებს და მათ მშობლებს, გავა დრო და ძალიან შერცხვება ყველას, შეიძლება ცხოვრებისეულ ჯოჯოხეთადაც კი გექცეთ დაფარული სინამდვილე. ამიტომ, დაივწყეთ ყველაფერი და ილაპარაკეთ სიმართლე, ამაზე დიდ საქმეს შაქარაშვილის სულის პატივსაცემად ვერაფერს იზამთ ცხოვრებაში.

მე კი, სანამ პირში სული მიდგას, მთელი ჩემი არსებით ვიბრძოლებ მახინჯი მენტალიტეტის წინააღმდეგ“, – წერს გეგა სალუქვაძე.

 

კომენტარები

Tags

Related Articles

Leave a Reply

Your email address will not be published. Required fields are marked *

Back to top button
გაზიარება
Close